Gasuapara, Feb 26, 2026: South Garo Hills a·jao donggipa 4-Rongrikkimgre GHADC constituency-ni dingtang dingtang polling station-rango kam ka·enggipa Congress dolni manderang, da·al February 26 tariko kam watgrimtokaha.

Rongrikkimgre polling station-o Congress dolna kam ka·enggipa manderang, Clinton R.Marak-ni noko tom·e chanchirimaniko dakenba, Congress dolna kimkim ong·e kamko ka·enggipa Congress dolni manderang kam watgrimtokaha, ine u·iataha.

Koborna u·iatani gitade, Rongrikkimgre constituency-ni dingtang dingtang polling station-rango kam ka·gipa manderang
Clinton R. Marak-na MPCC party tikit on·jahani gimin, MPCC dilgiparangni kamko jegale, Congress doloni ong·kattokaha.

Rongrikkimgre constituency-o MDC susana, Clinton R.Marak Congress party tikitna. dorgasto-ko galahachom. Indiba Meghalaya Pradesh Congress Committee (MPCC)-ni dilgiparang name sandichenggija aro ground report-rangko ra·chenggija, gipin candidate-na party tikit on·ahani gimin, Congress dolni manderang suk ong·jae, ra·chakna man·gijaniko parakatenba, da·al salni bako dingtang dingtang polling station-ni manderang baksa BCC aro DCC-ni Dakchakgipa Padot Jonicka R. Sangma aro gitcham MDC Panseng Marak baksa kam watgrimtokaha aro Clinton Marak-na chakgipa manderang Independent candidate ong·e susachina didiangtokaha.