Tura, Oct 1, 2025: Rongram Durga Puja Committee-ko a·bachengani, da·o bilsi 50 gapaniko ba Golden Jubilee-ko maniangaha. Hindu toromko olakkigipa dingtang dingtang jatrang apsan bakrime, Rongram Durga Puja-ko a·bachengaoni da·alona bilsi 50 gapaniko kusi ong·e maniani ong·a.

Rongram Durga Puja-ko 1975 bilsio a·bachenge, ia 2025 bilsio chu·gimik bilsi 50 gapaha. Ia Golden Jubilee-ko September 22-oni a·bachenge October 2 tarikona sal 9 manianggen. Pangna bilsian Durga Puja-ko salgittamsan manirongachim, indiba da·alo Golden Jubilee ong·ahani gimin, sal 9 manigen, ine Golden Jubilee Committee-ni President Ramesh Lohar aganaha.

Ia golden jubilee-ko maniaona Tura aro Rongram jolni wilwilao donggipa manderang bang·en re·baaha. Ia Golden jubilee-ko manina ramarango light-rangko ching·ate nitoataha aro nitoe pandalko tariaha, iako nina salantian ritchani ritcha olakkigipa manderang re·batokaha, ine Lohar aganaha.

“Chinga manderangoniko bang·a nama sikanirangko man·aha. Ian chingni olakkianiko a·bachengaoni da·o bilsi 50 gapaniko maniani ong·a. Chinga ia golden jubilee-ko dingtangmancha gisik ra·na gita dal·e maniaha aro pandal-ko pangna bilsirangna bate dal·bate tariaha. Chinga bang·a manderangni ka·sae dakchakaniko man·ahanina chinga uamangko namen mittela” ine Golden Jubilee Committee-ni President aganaha.

Ia bilsi 50 gapaniko olakkia mangmangsan ong·aija, indiba songsarna dangdike on·anirangkoba dakangaha. Bansara Eye Clinic, Shillong baksa bakrime, indin mikronko porikka ra·anirangko daktan baksa West Garo Hills-ni DRDA Project Director Nipon Hajong, ia golden jubilee-ko oprake on·aha aro uni dakchakachi kangal cholgrigipa bi·sarangna skulo nanggipa bosturangkoba suale on·angaha. Cultural program-rangko ong·ate, chadamberangni donnugipa changa sapanirangko mesokna aro doka dam·anirangko ong·atangaha. Uandake September 26 tariko Monika Singer-ba re·be git ring·e mesokangaha aro uko nina bang·a manderang re·batokaha. Bang·a olakkigparang re·bae bang·a blessingko on·angahani gimin, chinga namen kusi ong·aha ineba Lohar aganaha.

September 23-oni 25-ona dingtang dingtang program-rang jekai chrok-mesaani, doka dam·ani aro dakmesokanirangko ong·atangaha. Indake September 27 tariko a·dokni PHE Minister Marcuise N. Marak re·bae, Golden Jubilee-ni Souvenir-ko oprake on·angaha.

October 2 tariko chingni tarie olakkigipa Durga Mite-ko Rongram chibima-o galgen, uni salgipino chibimako rongtalatgen. Jedakode ka·machi donggipa damna aro manderangna serabera ong·jawa, chinga ta·raken rongtalataniko dakgen ine Golden Jubilee Committee-ni President aganaha.