Tura, May 23,2024: Tura Rongkhon Songgital-o donggipa jabol galram biapko TMB simsakjani a·sel, bang·a soa sima jabolrang chiringona man·pakange, chiringko nosto ong·atenga. Bilsianti wachini somoio mikkarang waani a·sel, soa sima jabolrang chiringona man·pakangenga.

Ua jabol galram biapko name retaining wall kadule jabolrangko galchina sepang jolo donggipa gittimni manderang bang·a complaint-rangko on·ahachim. Indiba TMB sisakgija galani a·sel indakgipa obosta ong·enga, sepang jolni manderang matnangataha. Maina jabol galram sepango mondoli ge·gnini gopramrang gnang. Ua gopramrango mande gopna a·kolrang cho·ani somoio chaktokgija senggipa bibarang manderangna chaktogijaniko on·a.

Unbaksana, ka·machi donggipa gittimni manderang, soa sima jabolrangni jokdapanggipa chiringni chiko jakkalna nangenga, uni gimin jabol galram biapko namedake retaining wall-ko tarina nanga ine sepang jolo donggipa gittimni manderang TMB-ko didiataha.

Iasan ong·gija sepang jolo donggipa manderang soa simani bibarangko rang·site dongna nangani gimin, an·seng baljokanina, namen kenbeani ong·enga, unbaksana chiringo donggipa na·tok na·batrangkoba nosto ong·atenga.

Jobolrangko nama bewalo galchina dingtang dingtang NGO-rang aro gittimni dilgiparang batanggimin salrango name nirokchina didiatahachim, indiba TMB knachakja.

Skotong Minister Conrad Sangma an·tangba, jabol galram biapona re·ange, niani ja·mano nambate taridapna ku·chakangaha. Indiba da·ona kingkingba maming ja·ku de·aniko dakujaengani a·sel salsa bate, bate soa sengani bibarang batroroenga, ine sepang jolni manderang parakataha.