Tura, Sept 29, 2024: West Garo Hills a·ja gimikon, Swachhata Hi Seva Campaign ba cleaning drive-ko ong·atengon,, Dadenggre Civil Sub Division-ni ning·o donggipa Rom Agal songoba, Swachh Bharat Cleaning Drive-ko September 28 tariko dakangaha.
Ia cleaning drive-ko dakanio Dadenggre jolni NGO-rang jekai ADIL, CEPARD, AAFY, Toromni dilgiparang, ICDS-o kam ka·giparang, songni nokni manderang apsan ku·monge, anti bajar-rangko, sorokrangko, Skul aro Waiting Shet-rangko rongtalatangaha.
Iasan ong·aigija mikkangchi an·tangtangni songko nokko ba gittimtangtangko rongtal an·talatanirangko dakenba, mandeni janggi tanganio an·seng baljokanina nangchongmotgipa kam ong·a ine parakataha.
Maina rongtal an·tale donganiara, mande sakantini be·en bimangko an·seng baljoke rakkiani mingsa namgipa chol ong·a. Uni gimin, mikkangchi sakantian an·tangtangkosan rongtale rakkiaigija, nok jamrangko rongtale rakkianiara, mandeni janggi tanganio nangchongmotgipa kam ong·a. Uandake mikkangchi an·tangtangko an·seng baljoke rakkina rongtaltalaniko nangchongmota ine NGO-rang parakataha.
