Tura, Apr 28, 2025: Batanggipa 1980, 1990 aro 2000 bilsirango bikotgipa dingtang dingtang Rock Band-rang, jemangan chol ong·jae, dingtang dingtang a·selrangchi bon·chipahachim, uandakgipa Rock Band-rangko tangatpilna aro Garo Hills-o Rock Music ba doka dam·anirang aro git ring·anirangko tange rakkiangpilna gita dingtangmancha Tura-ni Rock Revival Music Society (RRMS), Rock Musician-rang skanggipa changna tom·bimonganiko re·anggipa April 26 tarik Sonibar attamo, Tura Rongkon-o donggipa Aldara Resort-o ong·atangaha.
Ua tom·aniko ong·atani bidingo agan-talatangengon, Garo Hills-o Rock Music-ko tangatpiltaina aro Garo Hills-ni dokna dam·na changgipa Rock Musician-rangna cholko on·na aro dakchakna man·na gita 2024 bilsio Rock Revival Music Society-ko bikotaha aro ua salo dingtangmancha gitcham Rock Band-ni Membor-rangna cholko on·na aro gitrangko ring·taina cholko on·na miksonge Get-Together ba apsan gronggriktaianiko ong·ataha ine RRMS-ni President Romu Ch Marak parakataha.
Indake, tom·anio A·chikrangni doka dam·anina gisik nangdilgipa pagiparangoni saksa aro gitcham sorkari official Shekhar Sangma baksa South West Garo Hills a·jani Additional Deputy Commissioner (ADC) Dolrich Berin G Momin-ba dongpae, Garo Hills-ni Rock Band-rangna didiani aro ku·pattianirangko on·angaha.
Ua program-ko ong·atanio gitcham Band-rangoni Nazguls, Hi-Fi Stereo, Hex aro una Panacea dolni Tengkrang Sangma, Renegades-ni Osmond Sangma, Quiet Heart-ni Gene Kelly, Saturnalia-ni Olly Marak, Genes-ni Olivia Momin, Celestial-ni Tangringchi Momin, Che Guevara aro gipinrang gitrangko ring·e mesokangaha.
Ua program-ko chu·sokatna man·ahani gimin aro tangka paisarangko on·gilgipa, bil jakchi dakchakgipa aro program-o bak ra·gipa gimikkon RRMS mittelpilangaha.
