Shillong, May 18,2025: Manipur donggipa Regional Institute of Medical Sciences (RIMS)-o Nursing-na poraienggipa chatri saksa ong·na kragija bewalo sianina jakgitele sandianiko dakchina dabie, Meghalaya Pradesh Youth Congress (MPYC), Manipur a·dokni Governor-na sedoataha.

Abiel Salchiana Ch Marak, West Garo Hills-o donggipa Asanang-oni ong·achim aro ua RIMS-o B.Sc Nursing-ko 4-gipa Semester-o poraiengachim. Uni manggisiko re·anggipa May 14 tarik Budbar pringo, hostel-ni kuturi ge·saoniko nikaha.

Iani bidingo, Manipur a·dokni Governor-na sedoatengon, Imphal songjinmani RIMS-o poraienggipa A·chik chatri saksani sianiara uni nokdangna kalimanikosan ra·baa ong·ja, indiba gipin biaprango donge poraienggipa Tribal chatro chatrirangna jajrengchakaniko aro kenchakaniko ra·baaha ine MPYC-ni President Timjim K.Momin parakataha.

Ua chatri, uni poraichakenggipa biap aro hostel-o dokkol ka·e onchepaniko aro Institute-ni gita simsakgijaniko man·e, iandakgipa obostako chagrongna nangaha, ine janapatenba, ia a·selni bidingo kakketko ma·sina gita jakgitele sandianiko dakchina Momin, Manipur a·dokni Governor-ko mol·molataha.

Manipur a·doko poraienggipa dingtang dingtang biaprangoni chatro chatrirangna simsak nirokani aro chel·chakanirangko on·china gitaba MPYC, Manipur a·dokni Governor-ko didiataha.

Apsan daken ua chatrini siani bidingo Garo Students Union (GSU)-CEC, Tura-oniba judicial inquiry-ko dakchina dabiangaha.

“Ia chatri an·tangko so·ote siakon ine report-ko on·ahaoba, obostarangko nigenchimode, uni kosako sinjetani aro institute-ko chalaienggiparangni simsakgijaniko mesokani ong·enga, uni gimin ia chatrini sianiko maming mikkang niteani gri, jakgitele sandigenchimode, a·selko talbate ma·sina man·gen,” ine GSU-ni President Tengsak G Momin parakataha.

Indake ong·engon, ua chatrini ong·na kragija bewalo siahani gimin, Meghalaya a·dokni dingtang dingtang dolrangni nangrime bikotgipa Confederation of Meghalaya Social Organisations (CoMSO)-ba iani bidingo sandianiko dakchina dabie, Manipur a·dokni Governor-na sedoataha.

Indake kragija a·sel ong·anina suk ong·gijaniko parakatenba, “Ia chatrini sianiko an·tang so·ote sia ine report-ko on·genchimoba, ia chatrini kosako ong·gija dakanirangko matnangtokengani gimin kakketko ma·sina gitade, judicial inquiry-ko dakna nangenga,” ine CoMSO-ni General Secretary Balkarin Ch.Marak parakataha.

Ia a·selni bidingo jakgitelgipa judicial inquiry-ko ra·gatchina, Manipur a·dokni Governor-ko didiatengon, iani bidingo sakki donggipa chatro chatrirangna naljokaniko on·china, inquiry matchotkujaskal ia kamo chanchichipna kragipa RIMS-ni official-rangko ba staff-rangko kam dontongatchengchina aro Manipur-o poraienggipa Tribal chatro chatrirangna, mongsongbate Meghalaya-ni chatro chatrirangna chel·chakanirangko on·china CoMSO, Manipur a·dokni Governor-ko didiataha.