Resubelpara, June 26, 2025: North Garo Hills a·jani skotong Resubelpara-o, Garo Hills Autonomous District Council (GHADC)-ni branch office-ko kulie on·china Rongrong-ni MDC Rinaldo K Sangma, GHADC-ni CEM Albinush R Marak-ko Butbar salo gronge, an·tangni mol·mole segimin chittiko on·angaha.

North Garo Hills a·jao songdonggipa manderang, dingtang dingtang kajinarangko Council-na gamna nangengon, Tura-ona re·angna nanga aro re·a doanio korosrangko galna nangan baksa somoirangko gimaatna nangenga. Indaken kangal cholgrirangna namen neng·nikani ong·enga. Uni gimin East Garo Hills-ni skotong Williamnagar-o GHADC-ni branch office-ko kulia gita apsan daken, North Garo Hills-oba GHADC-ni branch office-ko kulie on·genchimode, a·jani manderangna namen dakchakani ong·genchim ine Sangma, parakataha.

GHADC-ni branch office-ko Resubelpara-o nangenggipara Land & Revenue Department, Taxation Department, Forest Department, Building Regulatory aro Development Authority, iarangan ong·enga.

Unbaksana, District Council Court, Circuit Branch-koba nangenga, jedakode North Garo Hills a·jani manderang Tura re·angna nanggija, North Garo Hills a·jani manderangna sepangbate District Council-ni kamrangko dangdike on·na man·a gita Council-ni branch office-ko kulie on·china Rongrong MDC-ni mol·molaniko CEM knachakenba, ta·raken nirokatna ku·chakaha ine Sangma parakataha.