@ghdnews.in@

GHD News, Tura, Nov 21, 2025: West Garo Hills a·jani Rongram C&RD Block-ni ning·o donggipa Rengsangre songo, bijoliko man·chengaoni bilsi 45 batpilahaoba, bolni bijoli krongrangkosa jakkalkuenga aro ian songni manderangna aro pilak janggi gnanggiparangna namen kenchakani ong·enga ine Asananggre songni saksa Social Activist Flaming B Marak parakataha.

Marak-ni parakatani gitade, ua songna 1980 bilsion MeECL, bijoliko sale on·chengaha aro untalan ua songni manderang, maming neng·nikani grian bijoliko jakkaltokenga.
Indake ong·genchimoba, ua songna bijoliko on·chengaoni da·alona kingkingba silni bijoli krongrangko jakkalani pal bolni krongkosa an·tangtang songe jakkalengani a·sel songni manderangna aro pilak janggi gnanggiparangna kenchakani ong·enga.

Batanggipa, “2022-2023 bilsirango, West Garo Hills a·jani Deputy Commissioner Ram Singh-ni somoio, bolni bijoli krongrangko gale silni bijoli krongrangko on·skachina songni manderang, mol·molaha aro manderangni dabia gitan, ua songo silni bijoli krongrangko songe on·china MeECL-ni Executive Engineer-ko ge·etahachim. Indiba, MeECL-ni Executive Engineer, DC-ni ge·etaniko knachakjaha aro ua songna silni bijoli krongrangko on·chipjaha,” ine Marak parakataha.

Ua songni manderang, bijoliko man·chengaonin bijolini kajinarangko gamtokenga, indiba MeECL department-ni manderang maming ja·ku de·aniko dakkuja. Uni gimin songo maiba dal·a a·selrang ong·na skangan, bolni bijoli krongrangko ra·galenba, silni krongrangko songskachina Marak, MeECL-ko didiataha.