@ghdnews.in@

Tura, Feb 3, 2026: Rimpu Bagan (RB) case-o sak 15 chadamberangna dai gamchina, Meghalaya Human Rights Commission (MHRC)-ni ge·etaniara, rim·a man·gipa chadamberangko dosgri ine mesokani ong·a, ine Tura-ni MDC aro BJP-ni State Vice President Bernard N Marak parakataha.

Bernard N.Marak-ni parakatani gitade, batanggipa 2022 bilsini July 22 tariko ong·anggipa a·selni bidingo MHRC-ni sandiroke man·aniara, unsalo pulusrangni chadrapaniara niamni a·palo ong·aha aro pulusrangni rim·gipa chadamberangara dos grirangsa ong·achim, ine sakkiko mesokani ong·a.

Rim·a man·gipa chadamberang, kakket bichalna ka·dongbee dakgrikaha aro bon·kamao kakketan chegipa ong·aha, ineba Marak parakataha.

MDA sorkario apsan bakrimenggipa dolan ong·engoba, a·doko NPP-chi dilenggipa sorkari, BJP-ni dilgiparangko nisan ka·aha aro Rimpu Bagan-ko chadrapna jotton ka·anichi NPP sorkari, BJP-ni adita sak member-rangko tol·gipa case-rangchi rim·na jotton ka·aha, ineba BJP-ni State Vice President matnangataha.

Dosgri chadamberangni kosako ka·gipa case-rang da·o seoka man·gipa dilgiparangon ga·akpilengaha, indiba iarangko sriksrik donnuna jotton ka·enga ineba Marak parakataha.

Me·gong Festival-ko ong·atani bewalko jegalatenba, ian man·e icha·giparangna indin ong·ate, kangal cholgrirangoniko tangka salope ra·na ong·atgipa “Chu Festival” sa ong·a ine Tura-ni MDC matnangataha.

Rim·a man·gipa chadamberangni kosako matnanganirangko da·o dosgri ine mesokaha aro MHRC-ni sandiroke man·anian ia case-ni bidingo talataniko ra·baaha ineba Marak parakataha.

Re·anggipa 2022 bilsini July 22 tariko, Tura-ni Edenbari-o donggipa RB-ko pulisrangni chadrapanio, mandena on·gimin bilko pe·aha ine badi ka·dogipa chadamberangna daiko gamchina, Meghalaya Human Rights Commission (MHRC), ge·ettaniko on·aha.

MHRC-ni u·iatani gitade, RB-ko pulisrangni chadrape rim·gipa manderangni ming 30 case-rangko MHRC segataha, indiba ia ming 30 case-rangoni ming 15-kode badi ka·gipa manderangan ra·pilaha.

Indaken, bangki ming 15 case-rangko MHRC sandirokaniko dakenba, dolgnionikon knatimani ja·man, ia 2026 bilsini January 29 tariko, Commission, bon·kamgipa raiko on·aha.

Iani bidingo MHRC, Meghalaya sorkarini Home (Pulis) Department-ni Principal Secretary-na sedoatenba, RB-ko chadrapanio mandena on·gimin bilrangko pe·ahani gimin, badi ka·dogipa sak 15 manderangna sakprako gong 50,000-ko dai gamchina Recommendation-ko on·angaha, ine u·iataha.

Ia Recommendation-ko ba ku·pattianiko MHRC, Protection of Human Rights Act 1993-ni Section 18 (e)-o pangchake on·angaha.