Shillong, June 4,2025: Sohra jolo gimagipa Indore-ni tourist Raja Raghuvanshi-ni sogimin manggisiko sal 10-ni ja·man, Weisawdong chidare sambao donggipa chubegipa a·kuangoniko June 2 tariko man·ahani gimin, nokdangni manderang, uni siani a·sel chong·motko, Central Bureau of Investigation (CBI)-chi sandianiko dakchina dabiaha.
Raja aro uni jikgipa bia ka·ani ja·man jiksesa kusi ong·e roramna, Meghalaya-ni Sohra jolo donggipa mingsinggipa tourist biapko nina gita re·bae gimaaha.
“Chinga bilaken ia mamlani bidingo CBI-chi sandianiko dabienga” ine sianggipa Raja Raghuvanshi-ni adatang Vipin Raghuvanshi Sombar salo kobor ra·timgiparangna NEIGRIMS-o aganaha.
“Joltangni Pulis maming dakeba kal·aka dongja ine aganaha. Indiba kal·aka dongjaode, maidake sigimin manggisiko man·aha,? Uamangni para ra·anggipa scooty-ko park ka·e dongipa biaponi km 25 chel·ao Raja-ni manggisiko man·aha. Chingni chanchipani gitade, uamangko Weisawdong chidareona rim·gittange ra·angaha” ine post mortem-na sengmitting somoio uni manggisiko Indore-ona ra·angpilna skang Vipin aganaha.
Uni jonggipa aro nosari maming saloba an·tangtangko so·ote sijawa ine Vipin a·kangaha. “Je biapo uni manggisiko man·aha, ua biapo maibakai a·sel ong·e ga·akoba, uamangoni saksasan ga·akanggen”, ine ua aganaha.
Uamang sakgniko rim·gittange ra·angenba, ra·seke ra·ani ja·mano so·ote galna nanga ine ma·drangni chanchichipaniko joltangni pulis jechakani gimin, Vipin pulisrangko matnange aganaha. “Uamang sakgnio jakstem ge·gni donga, Sonani chain, jakgitoko ganani, tangka bek aro mobile phone Raja-ni be·enoni gimaenga. Ua an·tangko so·ote siode, ia bosturang gimikan gimajawachim” ine Vipin aganaha.
Uamangko gimaaha ine nokdangni manderang, May 23 tariko missing report-ko on·aha aro ua apsan salni 1:45 bajimango uamang jiksesa, double decker living root bridge-oni re·bapilengaha, ine ma·gipana bon·kame phone ka·ataha, ineba Vipin aganaha.
Banomancha Raja-ni jikgipa Sonam Raghuvanshi gimaenga, ua biapko namdake sandichina, Vipin bil gnanggipa authority-rangko mol·molataha. “Chinga Sonam-ni janggi tange re·bapilako nangnikenga” ua nokdango jegrik ingrika dongja aro bobil dakaba dongja” ine ua agandapataha. “Uamang sakgni May 11 tariko kusi ong·en bia ka·aha” ineba Vipin aganaha.
Iani bidingo East Khasi Hills a·jani SP Vivek Syiem,June 2 tariko Murder Case-o register ka·aha aro ia mamlako ning·tue sandiatna gita Special Investigation Team (SIT)-ko songaha ineba SP parakataha.
“Pulisrang bil amadipet ia malmani bidingo namedaken sandienga, aro iano maming ong·gija dake kal·akani dongja, ine janapatenba, da·odipet Sonam bano dongenga darangba ma·sina man·kuja” ine Syiem agandapataha.
