Raksamgre, June 29, 2025: Pirot R.Marak-ko Nennen Rangsa aro uni mikchagipa Reknan K.Sangma, Lepson Rangsa aro Sengba Rangsa ka·saninggija so·ote galanina, Raksam Maharirang, NGO-rang jekai GSMC, ADIL, FAF, ASPF, AHAM aro songni manderang jegale, Pirot Marak-ko gisik ra·na mombatirangko so·e, uni janggina bi·chakaniko dakenba, Pirot Marak aro uni ma·drang maharina kakket bichalko on·china jinma re·jome dabiangaha.
Sianggipa Pirot Marak-ko gisik ra·na ma·drang maharirang, NGO-rang aro songni manderang, Rengegre kal·chakramo jinma tom·dake, Sonibar attamo uko gisik ra·na mombatirangko so·e bi·chakaniko dakangaha.
Nennen Rangsa gipin me·chikni segipa, Reknan Sangma-ko seburung man·e aro sel·e, an·tangni adatang Lepson Rangsa, jonggipa Sengba Rangsa baksa re·anggipa April 14 tarik walo Pirot Marak-ni gitokko rim·geke aro uni private part-ko rim·prete so·oataha.
Indake, kragija be·enni bakko kal·ake so·otahani gimin, Pirot Marak-ni adatang gisiko chaktojae, kakketko ma·sina sandianiko dakchina, May 7 tariko Tikrikilla Pulis Station-o badi ka·aha. Pulisrang badi ka·anio pangchake, ia donnue so·otani chong·mot a·selko tale ma·sina gita, Judicial Court-ona sedoataha aro Court, Raksamgre Civil SDO-na seate, Executive Magistrate-ko seoke, June 12 tariko Pirot Marak-ni manggisiko bipilchina ge·etaniko on·aha.
Indake, Court-ni order-ko ba ge·etaniko man·e, Raksamgre Civil SDO, Executive Magistrate-ko seoke on·ani ja·man, Tikrikilla pulisrang, Pirot Marak-ni manggisiko June 12 tariko bilpilaha aro post mortem ka·e nianio uko so·oatasa ine ma·sienba, badi ka·anio janapgimin manderang Nennen Rangsa, Reknan K.Sangma, Lepson Rangsa aro Sengba Rangsa-ko June 24 tariko rim·aha aro ua sakbri manderangko sing·sandina salgittam Pulisni ning·o donaha.
Ua sakbri manderangko salgittamna Pulis custody-o donani ja·man, Sukrobar salo matchotahani gimin, uamangko Judicial Court-ona rim·angaha aro sing·anirang chu·ongkujani gimin, Judicial Chief Magistrate-o bi·e, salgittamna pulis custody-ko ra·dapaha ine Pirot sagini ma·drang u·iataha.
Ia miselbegipa aro ong·ronggijagipa a·sel, ong·ahani gimin, Raksam Maharirang aro NGO-rang, mikkangchi iandakgipa a·selrang ong·taijachina aro songsalna kratcha·aniko ra·bajachina, mikkrakataniko on·angenba, ua sakbri manderangko niam gita bichal ka·enba, uamang Pirot Marak-ko so·otchongmota ine sakkiko man·genchimode, uamang sakbriko pasi on·china aro sianggipa Pirot Marak-na kakket bichalko on·china NGO-rang aro Raksam maharirang raken dabiangaha.
