@ghdnews.in@

Rongjeng, Feb 20, 2026::Pekgipa bosturangko jakkalani bidingo mikkrakatani program-ko East Garo Hills, a·jani District Social Welfare Office (DSWO) aro AHAM Rongjeng Regional Unit bakrime Rongjeng Civil Sub-Division-ni ning·o donggipa Mangsang Higher Secondary Skulo program-ko ong·atangaha.

Ia program-o East Garo Hills-ni Additional Deputy Commissioner (ADC), Diana G. Sangma, ‘Women Empowerment,’ ba me·chikrangko bil gnangatani aro me·chikrangni poraia skia man·ani, changa sapani aro an·seng baljokaniko bilake rakkiangchina agane, pekatgipa bosturangko jakkalaniara kenbegnigipa ong·ani gimin, chatro chatrirangko pekgipa bosturangoni chel·e dongchina aro gisiko nange poraichina didiangaha.

Uandake, District Child Protection Unit-ni Protection Officer, Mamuni K. Marak-ba program-o dongpae, bilsi chu·onggija bia ka·aniko champengna aro songsalo apsan ong·e, namgijagipa bewalko ja·rikchina didiangaha. Unbaksana Williamnagar DLSA-ni LADC, R Ch. Momin, Protection of Children from Sexual Offences (POCSO) Act, 2012-ni bidingo agan talate on·angskaaha.

Uni ja·mano DMHP-ni Psychiatrist R Ch. Marak, pekgipa bosturangko jakkalanichi chronic sabisini gimin aro Rongjeng Pulis Station-ni Circle Inspector, S A. Sangma-ba pekgipa bosturangko jakkale namgija kamrangona soka ine aganangaha.

Indake, ua program-o Mangsang-ni Nokma, Mangsang Higher Secondary Skulni Principal aro AHAM Rongjeng Regional Unit-ni President-ba dongpae bak ra·angaha.