@ghdnews.in@

Tura, Dec 28, 2025: Araimile Socio Cultural Club (ASCC) aro Garoland State Movement Committee (GSMC), December 27 tariko Goanang Multi Facility Centre-o West Garo Hills, District Administration baksa bakrime ‘Awareness on Drugs Abuse & Drugs Trafficking Program’-ko ong·atangaha.

Ia 2025 bilsini bon·angachibara Kristmas ja·man, manderangni noko tusidimue dongmiting somoio manderangko de·mesaa gita Goanang Multi Facility Centre-o nambegipa program-ko ong·atanio MBOSE-ni CEO Ma Balmuri K.Marak mongsonggipa sokgipa ong·e, bakko ra·engon, unbaksa Resource Person Araimile PS-ni Women Police SI Ma Silda N.Marak, GSMC HQ-ni Spokesperson Pa Ryan Ch Marak, General Secretary Pa Tony Tojrang B Marak dongpae bak ra·angaha.

Tom·aniko a·bachengon, mongsonggipa sokgipa baksana gipin sokgiparangko, Araimile Socio Cultural Club-ni President Te Ragim D Sangma mande ra·soan baksana tarigimin pul bibalni chokchimrangko on·angaha. Uandake saksa sakgipinko talatgrikangaha. Indake tom·aniko a·bachengon, Secretary-ni ku·rangchi Isolo bi·e, SI Silda N Marak an·tangni kam ka·e u·i-ma·sianirangko aro pekgipa bosturangara maidakgipa ong·a aro badita ming donga maidake uko basea sawarang ringa cha·a, uarangko talate on·angaha. Niamo pangchake mandeko maidake rim·enba pattoko donna aro dai gamanirang dongode badita ong·achim, uarangko talatangaha. Drugs-ni mitam sample-rangko, ra·bae uko jinmana mesokangjolaha. Uni ja·mano GSMC-ni Spokesperson Ryan Ch Marak, ia chasongo gimikni gitan jatko nisina gita kamko ka·enggipa gipin jatrang changduule dongenga, je chadambe bi·sarangan bilsi 10-oni bilsi 29-ona ong·giparangko nisan done, lekka pora gadangko ra·ongale songsalko name rikgipa mikkangchi namgipa songdonggipa, ong·na sigiparangko indake pekatgipa bosturangchi nosto ka·na miksonga gnang kamko ka·enga ine aganangskaha.
Uni gimin an·ching sakantian mikgaoe, gisik ronggrike simsak nirokna jatna ka·saana ine ku·pattiangaha.

Tom·aniona mongsonggipa sokgipa Ma Balmuri K. Marak, chadamberangni neng·nikanirangko aro gimaanganiko nike baditana kingking namgipa ramaona dilbana man·gen, chotchanggija re·mikkangdile namgipa ku·pattianirang baksana kamchi dakchakanirangko chu·gimik on·na man·jagenchimoba, jatna ka·saae gimaaniko nikna sikjae indakgipa program-rangko ong·atan baksa be·en pil·atna gita songsalni chadamberangna nirok simsakaniko dakdilenga ine ua aganaha.

Pekgipa bosturangni rokom, bimang, rong, maidakgipa mande, maidakgipa be·enni bako biji su·a ba maidake ringachim, uarangko ua talatangaha. Meghalaya-o DREAM Team-ni ua mongsonggipa dilgiparangoni saksa ong·a. Jerangan Meghalaya-ko drug free ong·atna krenggipa dilgiparang ong·achim. DREAM, inon chu·gimikde, “Drug Reduction Elimination and Action Mission” ba iamang pekgipa bosturangko jakkalgipa manderangko maidake sanna nanga aro mikkangchi maidakgipa kamrang ong·anggenchim, uarangni gimin rongtale talatan baksa Garo Hills-o Rehab Centre dongjagenchimoba, chinga dingtang dingtang cholrangko ra·e manderangna dakchakaniko on·ronga ine ua parakangaha.

Uandake slides-rangko mesokjole tom·aniko gisik nangdapatna gita ua dingtang dingtang drugs baksa nangchapgipa subject-rangko mesokangaha.

Bon·kame mittelpilskani kattarangko Araimile Socio Cultural Club-ni President Ragim D Sangma agane, Secretary-ni ku·rangchi Isolo bie tom·aniko dontogaha.