Shillong, March 8, 2026: NPP-ni dilgipa aro Dadenggre-ni gitcham MLA aro Cabinet Minister James Pangsang K. Sangma-na cholko on·ode, Rajya Sabha-ni MP-ko jako ra·na kusi ong·aigen ine aganaha.

Meghalaya a·dokni ge·samangmang Rajya Sabha Member Dr. W.R Kharlukhi-ni term re·baenggipa June 21 tariko bon·engahani gimin, uni term bon·ani ja·man, party, James Sangma-ko Rajya Sabha MP-na watatnaba donga ine koborko knasona gita man·enga.

“Election-na jagittam ba jabri somoirang dongkuenga, uni gimin da·o mamingkoba agana man·kuja. Rajya Sabha-na sako mancha watatgen, iani bidingo party-sa chanchigen” ine James Sangma Sonibar salo kobor ra·timgiparangna aganaha.

NPP-ni Rajya Sabha MP Dr. Kharlukhi, uni term bon·a ja·man, gnigipa term-na re·bataijawa ine parakaha aro ua Parliamentarly Politics-oni neng·takna nangnike chadambe dilgiparangna cholko wate on·skana miksongenga ine parakaha.

Uni gimin Rajya Sabha seat-na party, James K. Sangma-ko ong·jaode, Tura-ni gitcham MP aro NPP-ni dilgipa Agatha K Sangma, uamang sakgnioni saksako ra·skanaba donga ine chanchienga.

Iani gisepon, party, da·odipet Shillong Parliamentary Bye-Election-na candidate-ko seokani gimin mamingkon chanchikujaenga. Re·anggipa jao Shillong-ni MP Dr. Ricky Amdrew Jones Syngkon-ni a·gilsakko watangani ja·man, Shillong Parliamentary Seat bangbang ong·aha.

Indake ong·engon, VPP dolde, VPP-ni ku·wattimgipa, Batskhem Myrboh-ko Shillong Lok Sabha-ni candidate-na seokaha. Indiba NPP aro BJP dolde darangkon Parliamentary seat-na biming mingkuja. Uni gisepon Congress dolba, Shillong-ni gitcham MP Vincent H.Pala-kon biming mingna chanchisoengaha.