Shillong, Oct 20,2024:TMC aro warachakenggipa dolni dilgipa Dr. Mukul M. Sangma, re·baenggipa Gambegre by-eleksin-na NPP-chi chalaienggipa sorkarini bilko jakkalsrete, niamni kosako development-rangko a·bachengate ong·engani gimin matnangataha.

Dr Mukul Sangma-ni kobor ra·timgiparangna aganani gitade, “NPP-chi chalaienggipa sorkarini ong·gija bilko jakkalsrete Gambegre by-eleksin-na campaign ka·aniara, Eleksin Commission-ni on·gimin, Model Code of Conduct-ko pe·ani ong·a. Manderangna Development-rangko on·anio dongimin niamrangko ja·rike kam ka·na nanga, indiba NPP sorkarini ge·etanichi, Officer-rang Gambegre by-eleksin-na on·gipa niamko ja·rikgija kamko ka·enga. Sorkariko chalaigipa bilo donggenchimoba darang party-ba indake niamni kosako kam ka·na man·ja”.

“Development-ni kamrangko a·bachengna skang estimate aro sanction ka·gimin ong·genchimoba, eleksin-ni niamko ja·rikna nanga. Indiba da·ode, Skotong Minister an·tangan Gambegre constituency-ona re·ange kamko ka·enga” ine Dr. Sangma matnangaha.

Officer-rang, niamko ja·rikgija maidake kamko a·bachengna man·a ine Dr. Sangma, sing·doatenba, ian bilo donggipa dolni niamgri kam ka·ani ong·a ine parakataha.

“Ian MDA sorkarini niamgri kamrangko ka·ani ong·a aro manderangni seokako man·giparangni bilko jakkalsretani ong·a, ine Opposition dilgipa matnangaha. Uandake NPP-ni ong·gija kam ka·anirangko TMC sing·dogen. NPP banoni tangkarangko jakkalenga, iarangko sing·doanggen” ine TMC dilgipa parakataha.

Indake, NPP party-ni dilgiparang, MLA aro MDC-rang Gambegre by-eleksin-na campaign ka·aniko a·bachengataha ineba Dr. Sangma matnangaha.