Shillong, February 27,2025: Re·anggipa KHADC aro JHADC election-o dingtang dingtang dolrang, Khasi aro Jaintia Hills jolrango, National People’s Party (NPP)-ko ‘Garo Party’ dake ra·ani a·selsa Khasi Hills Autonomous District Council (KHADC) election-o bang·e seat-rangko chena man·jaha ine matnanganiko a·dokni Skotong Minister aro NPP-ni National President Conrad K Sangma jegalataha.

KHADC election-o NPP, seat dambrikosan chena man·aiaha. KHADC aro JHADC election result-rangni gimin janapatengon, batanggimin MP election-ona bate ia MDC election-o NPP party nambate dakna ka·dongachim, ine Sangma parakataha.

Re·anggipa MP election-ode NPP, Khasi-Jaintia Hills-ni bang·bata constituency-rangon amako man·aha, indiba ia MDC election-ode, vote man·ani nambataha ineba NPP-ni National President aganaha. “Election-o chu·sokgipa ong·na chinga rakbate kamrangko ka·na nangenga” ineba ua agandapangaha.

Voice of the People’s Party (VPP)-ni tang·dororoaniara, NPP-na ka·mikkenatani gita ong·engama ine sing·anina aganchakengon, NPP-de darang party-koba nom·e ra·gipa ong·ja aro darangkoba mikchepja, indiba ia MDC election-o VPP-ni vote man·ani komibataha ine Sangma aganchakskaha.

Khasi Hills jolrango NPP-ko ‘Garo Party’ dake ra·ani a·sel amako man·engama ine sing·engon, ian politics-ni gita agananisan ong·aia ine Sangma aganchakaha.
“NPP-ko ‘Garo Party’ ine manderang chanchibebegenchimode, NPP Jaintia Hills-o indita seat-rangko chejawachim aro KHADC-oba seat dambrikon chejawachim,” ine Sangma aganaha.

KHADC aro JHADC election-ni result-rangde re·baenggipa bilsio ong·atna sienggipa Garo Hills Autonomous District Council (GHADC) election-na maming nangchakeani dongjawa ineba NPP-ni National President aganaha.

KHADC-o VPP-chi dilenggipa Executive Committee (EC), pilak scheme aro project-rangkon jegalnaba gnang ine kenchaksoengani gimin sing·on, pilak poltical dolrangan manderangnasa dangdike on·enga aro pilak dolrangan namgninasa kamko ka·gen ine a·dokni Skotong Minister, ka·dongchakaniko parakataha.