Shillong, May 20,2025: Meghalaya Assembly-ni Speaker aro North Tura-ni MLA, Thomas A Sangma, saksa manderangni jakchi seokako man·pae aro Garo Hills-ni dilgipa ong·pae, Sonibar salo Tura-ko Winter Capital songchina dingtang dingtang dolrangni dabianiko namnikpae, chakpaaniko on·ataha. Iani bidingo sandianiko dakna, sorkarini songe on·na sienggipa Committee-ko pilakan ra·chakaha ine Sangma aganaha.

“Chinga Garo Hills-ni dilgiparang ong·pae, namen kusi ong·a, iarangko niroke kam ka·anide, chinga dilgiparangni daitoan ong·gen. Meghalaya-ara chonbegipa a·doksan ong·aia. Indiba chinga an·tangtangan skanggipa a·dokko mangrake ba tange rakkiangna nanggen” ineba Sangma aganaha.

Sangma-ni parakatani gitade, Winter Capital-na dabiani bidingo namedake am·sandianiko dakna, a·dok sorkari Committee-ko songgen. Ia Committee-ko songna gita pilak party-rangko man·chape, niksenggipa aro register ka·gimin political party-rang baksa Tura-ko Winter Capital songchina dabiengani bidingo apsan chanchirimgen aro nanga gita recommendation-rangko on·gen.

A·dokni Skotong Minister, ia Committee-ko skotong ong·e nirokgen ba Skotong Minister-ni nominate ka·ako man·gipa Minister saksachi dilanggen. Indiba pilak political party-rangan sakgni dilgiparangko nominate ka·e bak ong·atchina agantokaha. Unbaksana bil gnanggipa sorkari department-rangkoba Committee-o bak ra·china okamgen aro uamangni chanchie agan-ku·pattianiko ra·gen, ine Speaker aganaha.

Tura-ko Winter Capital songani bidingo, Committee-ni dakna nanggni kamrangara, am·sandianiko dakan baksa study ka·e nigen aro examine ka·gen, a·doko ge·gni Capital-rangko songani advantage aro disadvantage-rangko nisusagrikesa, dingtang dingtang NGO-rang aro Civil Society Group-rangni dabianiko dakgen, ine Sangma parakataha.