Baghmara, Oct 30, 2024: South Garo Hills a·jani Nongalbibra Jadi bajar jolrango re·anggipa jaoni da·ona kingkingba bijoli dongjae andal mindik ong·a, jasa batangpilaha ine A·chik Youth Social Welfare Organisation (AYWO) Nongalbibra Branch-ni General Secretary Sonji M.Sangma koborna u·iataha.

Sonji Sangma-ni u·iatani gitade, Jadi jolo poraienggipa bang·a chatro chatrirang bilsini bon·kamgipa porikkana poraianio bijoli dongjani a·sel namen neng·nikaniko chagrongtokengani gimin songni manderang AYWO Nongalbibra Branch-na badi ka·ataha.

AYWO Nongalbibra Branch, manderangni badi ka·atako man·soe, October 29 tarik Monggolbar salo, South Garo Hills a·jani Deputy Commissioner-na chitti sedoatenba, Jadi bajar jolrango nosto ong·gipa bijoli line-rangko ta·rake nirokatchina didiataha.

AYWO Nongalbibra Branch-ni Deputy Commissioner-na seatgipa chittio janapatani gitade, poraienggipa chatro chatrirangni neng·nikanirangko nirokatpachina aro ta·rake bijoliko sokate on·pachina DC-ko mol·molataha.

Chatro chatrirang poraina man·jae bilsini bon·kamgipa porikkarango fail ong·na nangode, sawa daitoko ra·gen, ine AYWO sing·doatenba, porikkani somoio bijoli dongjani a·sel porikkarango chu·sokna man·jaode, chatro chatrirangna dal·bea gimaani ong·gen. Uni gimin, Jadi Bajar jolni bijoli line-rangko ta·rake nirokatpachina aro chatro chatrirangni namgnina bijoliko ching·ate on·pachina gitaba AYWO, DC-ko didiataha.