Tura, March 6, 2026: Tura Danakgre A·kingni Nokma aro uni demechik a·dokni Skotong Minister, MDC candidate Charming N.Sangma, TMB-ni Chairman J.D Sangma, West Garo Hills a·jani Deputy Commissioner, Revenue-ni DC aro ADC baksana officer-rang aro gipin dilgiparangni kosako March 5 tariko Araimile Pulis Station-o badi (FIR) ka·doangaha.

Danakgre A·kingni Nokma, Enilla Ch Marak aro uni demechik Amanche Ch Marak, Skotong Minister Conrad Sangma, Charming N.Sangma, J.D Sangma, West Garo Hills a·jani DC aro gipin officer-rang aro dilgiparangni kosako FIR ka·aniara, Danakgre A·kingni a·arango niamgri a·a Pattarangko suale on·ahani gimin, uamangni kosako FIR ka·angaha.

March 5 tariko pringo, Danakgre A·king Nokmani demechik Amanche Marak-ni Araimile Pulis Station-o FIR ka·gipao janapani gitade, Meghalaya High Court-o ia case-ni bidingo WP (C) No. 671 of 2025-o sorkari, DC aro Revenue Department-ni kosako file ka·manahachim.

Danakgre A·kingni je biaprangkon sorkari (GAD) Department-ni a·a ine a·kangenba, niamgri a·a pattarangko sualahani gimin, uamangni kosako ia mokordamako ka·ahaa.
“Ia kam Court-o dongengkua aro gital bilsini bidingo sorkarina u·iataniko ba Notice-ko on·manahachim. Uandake Court-o case dongengmitingon, ia bilsi a·bachengachibara manderangni biming, Plot number aro a·ani damrangko on·e, list-rangko sualenga ine chinga ma·sina gita man·aha. Ia bilsini February 11 tariko, Skotong Minister Conrad K. Sangma, Danakgre A·kingni ning·o ga·akgipa Nikwatgre-o dongenggipa an·tangari manderangna a·a pattarangko sualaha.
Court-o kam chu·sokkujamitingon, tangka ra·e pattarangko ra·china manderangko draatenga,” ine FIR-o janapaha.

FIR-o janapani gitade, High Court-o kam matchotkujamitingon, a·a pattarangko sualaniara, Sixth Schedule-ni ning·o on·gipa, A·chik ma·kringko aro Nokmarangni bilko pe·ani ong·enga.
“Court-o kam dongengmitingo iandake pattarangko sualaniara ‘Contempt of Court’ aro chinga ma·chongni niam aro niam-retini (Constitutional rights) bilrangko pe·ani ong·a. Uni gimin, Skotong Minister, GHADC elektion-ni candidate Charming N. Sangma, Tura Municipal Board (TMB)-ni Chairman J.D. Sangma, WGH-ni DC, Revenue-ni DC aro ADC ia pattaranhko sualanio bak ra·gipa gital dilgiparangni kosako FIR-ko Register ka·china chinga mol·molenga,” ine DIPR-ni post-rang aro meeting-o donggipa manderangni noksa (photo)-rangko sakkina on·e, uamangni kosako ja·ku de·china Danakgre A·kingni Nokma aro uni demechik dabiangaha.