Tura, Nov 15, 2024:Garo Hills Autonomous District Council (GHADC)-ni ning·o kam ka·enggipa Non-Gazetted Employees Association (NGEA)-ni gitcham President Senora Johny Arengh-ko kamo ra·nappilchina Meghalaya High Court, changgnina kingking GHADC-ni Executive Committee-na ge·etaniko on·ahachim.

Koborna parakatani gitade, re·anggipa October 17 tariko Single Bench Justice, W Diengdoh-ni ge·etaniko chu·sokatjahani gimin Senora Johny Arengh-ko kamo ra·pilchina Meghalaya High Court, November 13 tariko, GHADC-na ge·etaniko on·taiaha. NGEA-ni gitcham President Senora Johny Arengh-ko batanggipa 2021 bilsio, GHADC-ni Executive Committee aro Officer-rangni kosako kragija matnanganirangko dakaha ine pa·sikenba, kamoniko ra·galahachim.

NGEA-ni President ua somoio Executive Committee-ni show cause notice-ko man·e, ua EC-na aganchakani aro talatanirangko on·ahaoba, uni talatanirangko jegalenba, kamoniko ra·galaha. An·tangni kamko bon·atahani gimin, Senora Johny Arengh suk ong·jae, ja·mano Meghalaya High Court-o badi ka·doangaha aro uni pal Ukil PT Sangma, High Court-o dakgrike, da·o una kakket bichalko man·pile on·ahachim.

Senora Johny Arengh-ni pilak man·gnirang baksa uko kamo ra·pilchina Meghalaya High Court, GHADC-ni Executive Committee-na ge·etaniko on·aha. Indiba maini gimin GHADC-ni CEM aro Deputy CEM, Senora Johny Arengh-ko kamo ra·piljaenga ine sing·doatenba, an·tangtangni man·gni dormaharangko bi·na ba am·na gita mande sakantion bil donga. GHADC-o kam ka·giparang an·tangtangni man·gni dormaharangko on·jaengani giminsa, uamangni dormaharangko on·china dabie, 2021 bilsio NGEA-ni dilachi, GHADC-o kam ka·giparang kamrangko ka·gija jingjengataniko dakahani gimin, NGEA-ni dilgiparangna GHADC-ni Executive Committee, show cause notice-rangko on·aha aro uamangni aganchakanirangko chu·ongja, ine parakatenba, NGEA-ni gitcham President-ko chu·gimik kamkon bon·atsrangaha aro gipin adita sak NGEA-ni dilgiparangkoba kam dondipataha.