Williamnagar, Sept 21, 2025:: Niksamso Garo Community Organization (NGCO), HQ Simsanggre North-Eastern Hill University Teachers’ Association (NEHUTA), Tura NEHU Campus-ko nambatatna kamrangko ka·anio champengataniko dakengani gimin matnangataha.

Batanggipa adita salrangna skangsan NGCO, NEHUTA-ni Tura Campus-o gong kror 94 tangkarangko cha·bokani bidingo matnangaha. Campus-ni gitcham Director Prof. S Gurudev-ni dongmitingo campus-o tangka cha·bokaha, indiba ua somoio maming sakki dongjani a·sel cha·bokani dongja, ine jechakaha.

Uandake Tura Campus-ni namroro-silroroanina aro mongsonggipa infrastructure project-rangko ra·gatani bidingo chanchirimna gita Executive Council (EC) tom·aniko ong·atna miksonganiko NEHUTA-ni champengna jotton ka·ani giminba matnangaha.

Ministry of Tribal Affairs, project-ni skanggipa bakna kror 45 tangkako watataha ine janape, organisation, uandakgipa project-rangko ka·anio ru·utatode namjawa ine mikrakataha.

“Batanggimin bilsi 30 mangonin, Tura Campus-ko galchipe donaha. Uni gimin da·on Tura campus-ko namdapatna cholrangko man·engani gimin uko watna nangja ine organisation aganaha.

Iarangna agreba NGCO, ta·raken Executive Council-ni tom·aniko ong·atchina dabiengon, tom·aniko man·a ong·ode, Tura-on ong·achina agan ku·pattiaha.

Organisation, students aro faculty baksana Garo Hills-ni dabianina chakpaengon, University-ko nama bewalo chalaina nangnikaniko janapataha.