@ghdnews.in@

Tura, Feb 4, 2026: Garo Hills-o ong·enggipa obostarangni bidingo re·mikkangna, Nangrimgimin A·chik Dol (NAD) jekon Unified Garo Organisation (UGO) ine mingachim, mijal February 3 tariko Garo Hills-ni NGO-rang aro Civil Society Organisation (CSO)-rang jedake GSU CEC HQ, Tura (T), ADIL, AIGU, AGHTEA, GSMC, ACHIK, AAYF, ANYO, GOERA, CSAWO, GHNTU, NTDF,
Tura Auto Union, AAYF, DINDAM, AAYWS aro NGCO Tura-o donggipa Council of Nokmas Conference Hall-o tom·e chanchirimtokaha.

Uamangni mongsonggipa chanchirimaniara, re·anggipa January 9 tariko rorirangni so·otako man·e sianggipa Matgrik Dilseng M.Sangma-ni nokdangna ma·mong sorkari, a·dok sorkari, district council aro environment department-oni dakchakaniko on·china dabiangaha. Gipin jatrangni A·chikrangming bading chiwalani bidingo chanchirimangengon, bading chiwalani biap, TNT-ko district council maidakgipa gipin jatrangna on·gen aro banona on·na man·gen. Ma·mong sorkari aro a·dok sorkari A·chik a·songo dingtang dingtang kamrangna A·chik a·songni a·ako nangchapgipa ong·ode, district Council-ni a·ako see-jote on·ani kri man·na nanggen.

Gipin jatrangni GHADC election-o MDC-na 1952-onin Indian Constitution-ni Sixth Schedule-ko niam pe·e member-na chakataniko mikkangchi champengangna tik ka·angtokaha.

Gipin jatrang A·chik a·songo skatang nappruke so·sojengjeng ong·ate A·chik me·chikrangko rim·sruke kataniko ba jik kimaniko, a·ningni gamrangko niamgri bikote nosto ka·anirangko, Garo Hills-o dongpaa dake A·chik jatko chikpangpilaniko mikkangchi nie dongchajawa, A·chik a·songni manderang sakantian A·chik a·songko chel·chakna re·chakatani aro mikkrakbeani sal somoi sokaha. Iako warachakja ong·ode, ja·mano Tripura a·dok gita cha cha, A·chik a·songba ong·gnok, uni gimin hai A·chik jat sakantian A·songtang Chigatangna sanalna nangchongmotengaha ine NAD parakataha.

Uni gimin re·baenggipa ia jani 13 tariko Garo Hills gimikni nangrimgimin NGO-rang dal·begipa tom·bimonganiko Tura-o ong·ate, jinma re·jomaniko dakna sienga, ianona sakantian, angni A·chik a·songan ine chanchipaa ong·ode, re·bae bak ra·epachina A·chik jat sakantikon mol·molataha.