Tura, March 21, 2026: Garo Hills-o songdongenggipa tribal manderangni kosako Bangladesh-oni niam gri napsrukbagipa manderangni duk on·ani, manderangko ka·mikkenatani, manderangko so·otani, A·chikrangni a·arangko ra·sekani, niamgri a·ningni gamrangko bikotdraani aro buring bolgrimni bolgrimrangko nosto ka·anirangko, Nangrimgimin A·chik Dol (NAD) raken jegalataha aro rim·a man·gipa NGO dilgiparangko ta·rake watpilchina dabiangaha.

Garo Hills-ni manderangna namen jajrengani aro kenchakna nangani ong·enga, maina Bangladesh-oni niamgri napbagipa manderang, tribalrangni a·a-chi aro gam-jinrangko ra·sekasan ong·aija, indiba manderangni tom·tome donganiko so·sojengjeng ong·atenga aro gipin jatgnini gisepo dingtang dingtang kajia golmalrangko ong·atna miksonge kamrangko ka·enga. Iandake manderangko kenatna jotton ka·anirangara, Indian Constitution-ni Sixth Schedule-o Scheduled Tribe-rangna on·gimin niamrang aro uamangni bilrangko gimaatna jotton ka·ani ong·enga, ine NAD parakataha.

Dingtang dingtang jatrangni gisepo kajia ong·ataniara niamgri napsrukbagipa manderangni, A·chik a·songo meli nangrime donganiko nosto ka·na miksonganisa ong·a ine NAD janapatenba, niamgri napbagipa manderangko a·dok sorkari aro bil gnanggipa manderang champengna man·jani aro jrip dongani a·selsa iandakgipa obostarang Garo Hills-o ong·enga, ine NAD sorkarini kamko jaksi otataha.

“Chinga NGO dilgiparang aro gipin manderang, jerangan tribal manderangni chong·motan jatni namgnina aro manderangni a·a-chi, gam-jin aro man·gnirangko chel·chakna dakgrikdilgipa NGO dilgiparangko kragija rim·e, kae duk on·aniko raken jegala”.

NAD-ni mongsonggipa dabianirangara, je NGO dilgiparangkon pulisrang rim·ahachim, uamangko ta·raken watpilna nanga.

Bangladesh-oni niamgri napretbae kajia ong·atgipa manderangni kosako namedake am·sandianiko dakna nanga.

Garo Hills-o A·chikrangni a·arango niamgri songdongenggipa manderangko ta·raken a·rikgalna nanga.

Mikkangchi niamgri naprubagipa manderangko champengsona gita sima arirango bilake nitimgiparangko donna nanga aro niamrangko bilakbatatna nanga.

Sixth Schedule-ni ning·o on·gimin, tribal jatrangni bilrangko bilake rakkina nanga.

Garo Hills-ni tribal manderang pangnan niamo pangchake tom·tomao ku·mong nangrime dongenga. Indiba ka·onangatani, kakketgija dakani aro manderangni ku·rang on·anirangko champengataigen ong·ode, batesa manderangni gisepo kajia golmalrang ong·batanggen, ine NAD parakataha.

“Chinga State aro Central Government-ko aro pilak bil gnanggipa manderangko, kakket bichalko on·china aro indigenous manderangni man·gnirang, niam-reti aro bilrangko mande ra·e rakkina aro niam gita bilake kamrangko ka·china mol·mola” ineba NAD dilgiparang sorkariko didiataha.

NAD, A·chik manderangni a·a-chi, gam-jin, niam-reti, dakbewal-rikbewalrang aro mikkangchi janggi tanganiko name rakkiangna gita mangrakgipa bilchi pangnan chadenggen, ine parakataha.