Manipur, Feb 13,2025: Manipur a·dokni Skotong Minister Nongthombam Biren Singh Skotong Minister-ni kamko watani salbri ja·man, Ma·mong Sorkari ba Union Government, February 13 tark Bristibar salo Manipur a·doko President Rule-ko ra·gataha.

Re·anggipa 2023 bilsini May jaonin Manipur a·doko Meitei aro Kuki-Zo jatgni manderangni gisepo so·sojengjeng kajia ong·e, dakgrik dinggrikna a·bachengaha aro indake jatgni dakgrik dinggrikani a·sel sak 200-na baten manderangni janggirang gimaatako man·aha. Uandake, Manipur a·doko so·sojengjeng kajia ong·e, jatsa jatgipinko so·otgrikanirang aro nok jamrangko so·e galanirang bilsigni batangpiloba, Skotong Minister, a·doko tom·tomaniko ra·bana gita man·jaha. Indake jatgnini gisepo kajia ong·mitting somoion, N Biren Singh an·tangni Skotong Minister ong·aniko watna am·a dakeba, watchipgija dongaha, indiba ia bilsio bang·a warachakenggipa political dolrangni pressure ka·ani gimin man·chakjae, re·anggipa February 9 tariko Skotong Minister-ko wataha.

Manipur a·doko BJP sorkariko rikachim. Indiba a·doko tom·tomaniko ra·bana man·chipjani a·sel re·anggipa, 2024 bilsini November jao, Conrad K.Sangma-ni dilenggipa NPP dolba, N Biren Singh-ni sorkarina chakpaaniko ra·galaha. Uni ja·mano N Biren Singh, Union Home Minister Amit Shah aro BJP-ni National President JP Nadda baksa tom·e chanchirimani ja·man, re·anggipa February 9 tariko Skotong Minister-ni kamko watgalsrangaha.