@ghdnews.in@

Resubelpara, Feb 13, 2026: North Garo Hills a·jao donggipa Mendipathar Train Station-o a·dok gipinni manderang, napdrabae kam ka·engani gimin, Meghalaya Pradesh Youth Congress (MPYC) jegalatenba, iani bidingo ta·raken sandianiko dakchina dabie, North Garo Hills a·jani Deputy Commissioner-na sedoataha.

MPYC-ni DC-na sedoatgipa chittio janapatani gitade, re·anggipa 2025 bilsini December 28 tarikonin kam ka·enggipa a·dok gipinni manderang 100% train station-o rake loading ka·engani a·sel, joltangni manderangde saksaba Mendipathar Train Station-o kam ka·giparang dongja, uni gimin niamgri napdrae Mendipathar train station-o dongkame kam ka·na jotton ka·enggipa manderangni kosako raka ja·kurangko de·china MPYC, DC-ko didiataha.

Mendipathar train station-o rake loading ba rel gario koelarangko gatna re·bagipa manderang Mendipathar jolrango batroroengahani gimin, uarangko ta·raken sandie check ka·china MPYC-ni President Timjim Momin dabiangaha.

Momin-ni parakatani gitade, re·anggipa 2025 bilsini December 28 tariko a·dok gipinoni kam ka·giparang sak 400-na baten, Mendipathar train station-o rake loading ka·na ba koela gatna manderangko rimbaaha. Ia tain station-o rake loading ka·na changgipa joltangni manderang bang·en gnang, indiba joltangni manderangde cholko man·rongpaja. A·dok gipinni manderangsa Mendipathar train station-o a·doktang gita cholko man·skaenga aro dongkamgipa manderangni mipalko ra·seke cha·enga. Uni gimin joltangni chadamberang aro salanti hajira kam ka·e cha·giparang train station-o rake loading ka·pana cholko man·ja, ine janapatenba, iani bidingo ta·raken ja·kurangko de·china aro joltangni manderangna cholko on·china Momin didiataha.

2025 bilsini December 28 tariko a·dok gipinni re·bagipa labour-rangko contractor-rang ba agency-rang namedake sandienba on·na nanga aro niam gita uamangni kosako ja·ku de·na nanga ine MPYC dilgipa dabiangaha.

“Mendipathar railway station-ona a·dok gipinni labour-rang 100% rake loading ka·giparang dongchongmota ine anga nikna man·a. Uarangni palo a·jatangni local Iabour-rangna cholko on·na nanga. Indian Constitution-ni ning·o Sixth Schedule-na on·gimin bilo pangchake, tribal manderangko chel·chakna nanga aro Sixth Schedule a·jao dongkamgipa manderangna janggi tangani cholko on·na nanga” ine Momin dabiangkuaha.

Assam a·doko niamgri songdonggiparangko a·rikgalani ja·man, kam ka·giparang, Mendipathar jolrangona ka·sin ka·sin napsrukbaenga, uarangko check ka·sogipa dongjani gimin, tribal-rangni a·ako aro bilko ra·sekna jotton ka·enga. Uni a·sel Sixth Schedule a·jao songdonggipa manderangna namen kebeani ong·enga ineba MPYC dilgipa parakataha.

Re·anggipa January 9 tariko West Garo Hills a·jani a·kawe jolo donggipa Goalgaon songo maini gimin a·sel ong·aha, ian a·dok gipinoni kam ka·na pa·sike re·napbagipa manderangko sandisojani a·sel, mande janggi galaona sokaha ine Momin mikkrakataniko on·ataha.

“Uni gimin, anga mol·molna sika” 2025-ni December 28 tarikoni a·dok gipinoni kam ka·na re·bagiparangko namedake sandina nanga. North Garo Hills-o 100% tribal labour-rang railway station-o rake loading ka·na man·giparang gnang. Uni gimin a·dok gipinoni Meghalaya a·dokona napbagipa labour-rangko sandie champengsona nanga. Mendipathar jolona niamgri napbae songdonggiparangko champengna bilaken am·sandianilo dakna nanga, ine Momin District Administration-ko didiataha.