Tura, Nov 7, 2024: Election Commission of India (ECI)-ni tik ka·gimin gita ia November jani 13 tariko ong·atenggipa Gambegre by-election-na dingtang dingtang political dolrang aro candidate-rang campaign-rangko ka·engon, Dr. Mukul Sangma-ba TMC candidate Ma Sadhiarani Sangma-na Butbar attamchibara Okkapara Songgitcham-o campaign ka·angaha.

TMC-ni dilgipa aro a·dokni gitcham Skotong Minister Dr. Mukul Sangma adita salrangonin Gambegre constituency-ni ning·o donggipa dingtang dingtang biaprangona re·ange campaign ka·angengon, NPP-de BJP-ni atchiatgipa dol ong·a. Re·anggipa 2018 bilsio Conrad K Sangma, MLA chakate Skotong Minister ong·ama? MLA ong·gijan Narendra Modi aro Amit Shah re·bae, uko Skotong Minister-na jaksi ote donangaha. Skotong Minister ong·ani ja·mansa nogipa Agatha Sangma an·tangni MLA-ko wate on·aha aro by-election-ko ong·atesa Conrad Sangma MLA ong·aha. Una skangde, ua Selsella Assembly constituency-o changgni amako man·e, MLA election-o susana kenahachim ine aganangaha.

NPP aro BJP mess kimilko ganne, manderangko majona jotton ka·enga, na·simang da·a uamangni akoko naprim, skatang vote on·ode a·song sigen ma·sirimbo. Maini gimin Conrad Sangma-ko Meghalaya-ni Skotong Minister songaha, NPP aro BJP adasa abisa gita chacha ong·a. BJP ma·mongo National Democratic Alliance (NDA) sorkariko rikenga, Meghalaya a·doko Meghalaya Democratic Alliance (MDA) rikakenga iara adasani sorkari ong·jama, ine Dr. Sangma NPP aro BJP-ko jaksi otaha.

Re·anggipa Lok Sabha election-o BJP aro NPP apsan bakrime NPP candidate-na kam ka·e uamangni meligrikaniko kamchi parakaha, uamangni kamko sawa bebe ra·gen. Indiba saobarang tangkana mikboke an·tangtangni vote-rangko palenga, iara tol·ama? Gimikan ma·sitoka, indiba tangkachi mikbokatenga ine TMC dilgipa matnangaha.

“Lok Sabha election-o BJP aro NPP dolgni nangrime gipin candidate-rangko amna jotton ka·aha. BJP aro NPP dolni mes ine chanchigipara perusachim, maina mesni ganding go·okako manderang nikna man·aha” ine Dr. Mukul matnangaha.

NPP aro BJP-ni noksarang dingtanggrikoba, uamangni miksonganirangde apsan ong·a ineba TMC-ni dilgipa aganaha.

Vincent Pala minggipa haiwa MPCC-ni President, da·o election-na mangmang re·bae, dal·a dal·a kattarangko aganenga, na·simangni neng·nikaniko bia ma·siama, na·aimangni duk mikchi ong·an salo bia re·bagenma, re·bajawa uko ma·sirimbo. Congress-o dilgiparang dongama, dilgiparang dongjani a·selan Congress MLA-rang NPP-o naptokengjok. Indide na·ong Congress-o ka·dongkugenma? Ka·dongna man·jaen, Congress MLA-rang katokenga. Skang NCP-ni somoio Tura-ni MP Agatha Sangma-na UPA sorkari cabinet on·aha, Shillong-ni MP Vincent Pala-nade on·jani gimin chinga Delhi-chi re·ange una cabinet on·china mol·molaha aro on·aba on·aha.

Indiba ja·mano uamang sakgnikon cabinet-oniko ra·galpilaha, maini a·sel kam changjani gimin, basakoba doltangni sorkari riko Cabinet Minister-rangko ra·galpilama, kam ka·na changja, a·songko aro jatko dilna changjani a·sel ong·jok, kam changgipa cabinet Minister-rangko maming saloba ra·galpilja. Da·o Conrad Sangma-ko matnangenga, Conrad Sangma gitaba cholijawa, chalaie nie sorkariko man·ode ine Dr. Sangma rabiataha.