@ghdnews.in@

Baghmara, Dec 9, 2025: South Garo Hills a·jao donggipa, Mon Rongsna Government Lower Primary (LP) skulni Headmaster, Headring M Marak, 2015 bilsionin skul ka·gija dormaha oke cha·enga ine songni manderang matnangenba, ua Headmaster-ko kam ra·galsrangchina sorkariko didiataha.

Ua obostani bidingo songni manderangni palo, Social Activist Greneth M Sangma, South Garo Hills a·jani Sub-Divisional Skul Education Officer (SDSEO)-na badi ka·e sedoataha aro ua headmaster-ni kosako rakgipa ja·kurangko de·china didiataha.

Greneth Sangma-ni badi ka·e sedoatani gitade, ua skulni Headmaster, 2015 bilsionin skul ka·chipjahani gimin, songni manderang changni chang badi ka·ahachim, indiba ua kamtangko ka·na gisiko nangjaha aro ja·mano ua headmaster-ko bilsi bongana kam dontongataha (suspend) ka·ahaoba, ua skulchi re·gija, an·tangni dormahako oke cha·kuenga.

“Ia skulni Managing Committee aro Mon Rongsna Govt LP skulni President baksa tom·e chanchirimon, ua skulni Headmaster Headring M Marak, 2015 bilsionin 2025 bilsionan skulchi re·gija dormaha oke cha·enga ine ma·sina man·aha. Skul Managing Committee (MC)-ni aganani gitade, ua skigipani kosako uamang baditaba chang badi ka·doahachim indiba uni kosako da·onaba maming ja·ku de·aniko dakkujaenga. Uni giminsa ua Headmaster-ko kam bon·atsrangchina Managing Committee aro songni manderang nangniktokenga,” ine Greneth Sangma parakataha.

Ua Headmaster-ni skul ka·chipjani a·sel sak 20 bate chatro chatrirang, poraiako dontongna, nangaha ine janapatenba, ua skigipani a·sel songsalna, a·songna aro mongsongbate A·chik jatna dal·bea gimaani ong·aha ine Greneth parakataha.

“Uni gimin sorkarini service rule-rango pangchake ua Headmaster-ko sal 15-ni gisepon kamoniko ra·galsrangchina aro uni biapo sakgipin Headmaster-ko rakkiskachina anga didienga,” ine Greneth Sangma parakataha.