@ghdnews.in@

Tura, Feb 7, 2026: “Chinga, Rimpu Bagan (RB) Case-ni complainants, iachi indake see u’iatenga, je re’anggipa 29 January 2026, Sukrobar salo Meghalaya Human Rights Commission (MHRC)-ni on’gimin order gita, mandeni bilrangko (Human Rights), pe’ahani gimin , je duk man’gipa complaint ka’gipa sakprakna gong 50,000/- ka’e gamna (compensation) on’china ku’pattiahachim”.

Bilsi bri mangna dingtang dingtang dake neng’nikani aro saknaanirangko chagrongani ja’mano, ia ge’etaniara (order) chingna kakket bichalko (justice) man’ani ong’a. Beben, ua somoio “Chinga je dakgipa dukrangko, kratcha’atataniko aro chingko kragija jakkalanirangko man’ahachim aro songsalo biming namgijanirangko man’ahachim, uarangko maming dakeba tangka-paisa chi tona man’ja, indiba daito ra’ani chin gita chinga ua compensation-ko ra’chakgen”.

Chinga indake Sorkariko mol’molna sika, je ia gamaniko da’o February ba March 2026-ni gisepgriko, chingna on’na nanga. Somoi gita on’jaode, “Chinga niam gita chubatgipa gadangona re’angna draatako man’gen”.

Rongtale dakaniko aro daito ra’aniko mesokna, aro ma’sie ra’gimin kakket bichal, ru’utatanichi choligija ong’jana gita, “Chinga ia u’iataniko jinma na parakatenga,” Rimpu Bagan Case-o badi ka·giparang.