Tura, Aug 27,2024:A·dok sorkarini ra·gatgipa Meghalaya Grassroot Music Project (MGMP)-ko ong·atani maming namgniko man·ja, batesa a·dokni tangka paisarang indin koros ong·enga ine Tura-ni saksa PD Sangma, matnangatenba, ia project-ko bon·atsrangchina a·dok sorkario dabiangaha.

Ia program-ko tourism office-o kam ka·giparangsa indin somoi re·atna gita ong·atenga, indiba sorkari office-rango kam ka·giparangde, indakgipa program-rangko, concert-rangko aro git ring·ani program-rangko ong·atanio bak ra·na nangjachim. Office-o kam ka·giparang, indakgipa program-rango bak ra·ani pal neng·take roon nambatgen.

Sorkario kam ka·giparangan, indakgipa program-osa gisik nanggenchimode, sawa office-o donge kamrangko ka·skagen, ine PD Sangma sing·doataha.

Grassroot-ni ortoara, chadamberangni changa sapaniko dake mesokanikosa miksonga. MGMP-de, ia miksonganiko ja·rikskaja. Ia program-ni ning·o, studio-rango git chipgimin manderangnasa cholko on·skaenga ineba PD Sangma matnangataha.

MGMP-ko Tourism department-ni gita ramasamrango, cafe-rango aro badiaba nokrango ong·atengon, badiaba biaprangode, git ring·gipa aro dakmesokgiparangko nigiparangan dongsrangja, ineba Sangma parakataha.

Uni gimin, sorkarini indin tangka paisarangko koros ka·aniko mesokanisa ong·enga. Indakgipa program-rangde sorkario kam ka·giparangna ong·ja, indiba dingtangmancha dolni manderangsa jako ra·e, ong·atna nanga ine Sangma parakataha.

Sorkarini on·enggipa chol aro tangka paisarangko ramram manderangsa ba private dolrangsa namgniko man·na nanga. Indiba sorkari department-rango kam ka·giparangde, indakgipa namgnirangko man·na kraja ine Sangma jegalataha.

Uni gimin, MGMP-ko bon·atsrangon nambatgen, sorkario kam ka·giparangsa iani namgniko man·enga, indiba ramram manderangde ba chadamberangde, MGMP-ni maming namgnikon man·jaenga. A·doko indakgipa program-ko ong·atana bate, ong·atgija bon·aton nambatgen. Sorkari indinsa tangka paisarangko koros ka·e bon·atenga, maming namgni dongja ineba Sangma parakataha.