Resubelpara, Sept 19, 2024: North Garo Hills a·jani Bajengdoba C&RD Block-ni ning·o donggipa Mendal Jemangre Adhoc LP skul nok namsrangjahani a·sel, poraienggipa bi·sarang aro skigiparang neng·nikanirangko chagrongtokengani gimin, ua skul nokko ta·raken rikpiltaie on·china, A·chik Holistic Awakening Movement (AHAM) Bajengdoba Regional Unit-ni dilgiparang, a·dokni Skotong Minister Conrad K Sangma-na sedoataha.

Koborna u·iatani gitade, Mendal Jemangre Adhoc skulo poraienggipa bi·sarang sak 20-na bate gnangchim, indiba ia skul nokko changsaba taridape on·na dongjani a·sel skul namsrangjae, skul bi·sarang aro skigiparang neng·nikanirangko man·tokenga.

“Ia skulan wilwilao donggipa dingtang dingtang songni bi·sarang a·gilsakni seng·aniko skie ra·enggipa skul ong·achim, indiba skul nokni obosta namsrangjahani a·sel, skulni bi·sarang an·tangtangni lesson-rangko name skie ra·na man·tokjaenga” ine AHAM-ni dilgiparang parakataha.

AHAM-ni dilgiparangni parakatani gitade, ia skul nok obosta namja baksana class room-rangko name nirok simsakja aro sorkarini gitaba tangka paisarangko dakchakata dongjani a·sel ia skulko name chalaina man·jaengachim.

“Ia skul nokni nokkingrang nakolpruaha, kelkirang be·aha, pakmarang nosto ong·aha aro bi·sarangni asongchakenggipa bench-rangba bang·batan be·ahani gimin bi·sarangna kenchaknani ong·enga.Una agreba
ia skulo ringani chi aro bijoli dongja aro paikana nokba nosto ong·tokaha” ine AHAM Bajengdoba Regional Unit-ni dilgiparang parakataha.

Uni gimin ia skul nokko ta·raken rikpiltaie on·china a·dokni Skotong Minister-ko didiatenba, ia skulna chu·onga gita text book-rang, sechakani note bookrang aro gipin nangchongmotgipa bosturangko on·china gitaba AHAM mol·molataha.