Manipur, Nov 20,2024:Re·anggia November 11 tariko Manipur a·dokni Jiribam a·jao chel·chakgipa sipai dolrang baksa gogrikanio so·otako man·e sianggipa Kuki chadamberangko mande ra·e, uamangna kaket bichalko on·china, Monggolbar salo ritchani ritcha Kuki manderang coffin bangbangko ra·bite, Manipur a·dokni Churachandpur a·jao jinma re·jome dabiangtokaha.

Rally-ko ong·atna gita, skul aro college-rangni class X aro una batgipa class-rango poraienggipa chatro chatrirang pilakan rally-o bak ra·china aro duk ong·aniko mesokna chola T-Shirt gisimko ganchina, Zomi Students’ Federation (ZSF), Kuki Students’ Organisation (KSO) aro Hmar Students’ Association (HSA), Sombar salon jinma nangrime u·iataha.

Manipur pulisrangni kobor gitade, chanchichipgipa sak 10 bobil dolni manderang, a·doko chel·chakgipa sipai dolrang baksa camouflage chola longpant-ko gane silchi dare ra·bitgipa bobil dolni manderang Borobekra Pulis Station aro CRPF Camp-ni gisepo donggipa Jakuradhor-ni Jiribam a·jao pulisrangko silai gochengahachim.

Sak 10 Kuki chadamberangko so·otani gimin jegale, jinma re·jomaniko ba rally-ko Joint Philanthropic Organization (JPO)-ni gita ong·atangaha aro ua rally-o ritchani ritcha manderang lekka paltakrango see, banner-rangko ra·bite sianggipa manderangna kakket bichalko on·china aro Manipur a·doko donggipa, a·bri jol gimikna dingtang Administration-ko on·china dabiangtokaha.

Indake, jinma re·jomaniko ‘Wall of Remembrance’ ba Gisik Ra·na Pakmao see dongipa biapo matchotataha, maina re·anggipa bilsi May jaonin Manipur a·doko so·sojengjeng kajia ong·e, dakgrik dinggrikanio so·otako man·e sianggipa Kuki manderangko gisik ra·na, uamangni bimingrangko see dongipa biap ba pakma sambao mombatirangko so·e bi·chakaniko dakangaha.

Rally matchotani ja·mano, jinma apsan nangrime, ma·mongni Union Home Minister Amit Shah-na District Administration-ni jak gita Memorandum-ko on·angjolaha.

Kuki-Zo group-rangni a·kanga gitade, Jiribam-o so·otako man·e sianggipa manderangara Village Volunteer-rang ba songko nokko nitimgipa manderangsa ong·achim, bobil dolni manderang ong·jachim. Indiba a·dok pulisrangsa gogrikani ja·mano bang·a silchi darerangko gogrikgipa biaponiko man·aha ine a·kangskaenga, uan kakket ong·ja ine Kuki-Zo group-rang parakatskaha.

Manipur a·doko so·sojengjeng kajia golmal ong·anichi sak 200-na baten manderang so·otako man·aha aro sak hajal baten nok-jam gri janggi tangna nangengaha. Kajia ong·ani ja·pangara, Manipur a·doko songdongenggipa jatgnini gisepon ong·aha aro uan, Imphal-ni a·kawe jolo donggipa Meitei-rang aro a·bri jolo donggipa Kuki-Zo-rang baksa re·anggipa bilsi May jaonin kajia ong·anirang namchipnan man·jaengachim.