Imphal, May 15,2025: Butbar salo Manipur a·dokni Chandel district-o Assam Rifles Unit baksa bobil dolrangni gogrikanio, komibeoba sak 10 bobil dolrang so·otako man·aha, ine official saksa parakataha.
Sima ari jolrango so·sojengjeng obostarang ong·engani bidingo, Indo-Myanmar sima ari sepang jolrango operation-ko a·bachengataha. Army-ni Eastern Command saksani parakani gitade, Khengjoy Pulis Station-ni ning·o donggipa New Samtal song sepang jolo silchi dare ra·bitgipa manderang re·ruraenga ine koborko ma·soe, sandianiko dakengmitting somoio gogrikani ong·aha.
“Chandel district-ni Khengjoy Thana-ni ning·o ga·akgipa New Samtal songni sepang jolo, Silchi dare ra·bitgipa manderang, ong·katenga ine koborko man·soe, Spear Cops-ni ning·o Assam Rifles Unit, May 14 tariko Indo-Myanmar sima ari sepang jolo operation-ko a·bachengataha” ine Eastern Command aganaha aro X-o post ka·ataha.
Operation-ni somoio troop-rang, chanchichipgipa bobil dolrangko am·sandie rim·na daitoko ra·aha ineba parakataha. “Troop-rang bobil dolrangni kosako silai goaha aro rang·san bobil dolrangba gochakskaha. Indake gogrikani ja·mano sak 10 bobil dolni manderang so·otako man·aha aro adita silchi darerang aro guli barut-rangkoba gogrikgipa biaponiko man·aha” ine official saksa parakataha.
