Williamnagar, Oct 22, 2024: East Garo Hills a·jao donggipa Mangsang, Rangme Agal Government LP Skul nokko name rikjaengani gimin, AHAM Eastern Zone (EZ), Williamnagar contractor-ni kosako East Garo Hills a·jani Sub Divisional Skul Education Officer (SDSEO)-na Sombar salo badi ka·doangaha.
AHAM Eastern Zone-ni SDSEO-na badi ka·doangani gitade, Mangsang Rangme Agal Govt. LP Skul nokko rikenggipa contractor, manderangni nangnika gita kamrangko ka·jaenga ine matnangaha.
Mangsang Rangme Agal LP Skul nokko rikanio manderangni nanga gita rikjaenga, ine matnangenba, contractor ua Skul nokko kam matchotgija donenga ine AHAM Eastern Zone, parakataha.
Contractor ua Skul nokko rika ta·rake matchotatjaengani a·sel, Skulo poraienggipa bi·sarang neng·nikaniko man·tokenga. Uni gimin Rangme Agal LP Skul nokko ta·rake matchotatchina, AHAM Eastern Zone, East Garo Hills a·jani SDSEO-ko didiataha.
