Resubelpara, Mar 8,2025: Rongrang-ni MDC Ronaldo K.Sangma, North Garo Hills a·jao District Selection Committee (DSC)-ni LDA-cum-Typist kamna ra·ani bidingo talatchina, North Garo Hills a·jani Deputy Commissioner-na sedoataha.

North Garo Hills a·jao LDA-ni kamna adita somoirangna skangan porikkako seatahachim, indiba da·alona kingkingan interview-ni result-rangko parakatgija donengani gimin, Rongrong-ni MDC, iani bidingo sing·doataha.

A·dokni gipin a·jarango dingtang dingtang porikkarangna jakkalgipa Optical Mark Recognition (OMR) System-ko jakkalgija question paper-rangosa answer-rangko seataha aro una agreba dingtang dingtang kamrangna seatgipa porikkani result-rangkoba North Garo Hills-ni DSC parakkujaenga, ine MDC, Deputy Commissioner-na badi ka·e sedoatgipa chittio janapataha.

Rinaldo Sangma-ni parakatani gitade, ia porikkako ong·atna skangan, maming donnuani gri porikkako ong·atchina ua Deputy Commissioner-ko didiatahachim.

“Indiba angni jajrengchakanide, Resubelpara MLA-ni degipako DSC-ni Vice Chairman songahani gimin, mikkang niteanirang aro porikkako kal·akanirang dongnaba gnang. Gipin a·jarango OMR System-ko jakkale kamrangna seokengon, maini gimin North Garo Hills a·jao OMR System-ko jakkalgija question paper-rangosa answer-rangko seatna nanga”, ine Sangma sing·doangaha.

North Garo Hills a·jani manderang, nama bewalo kamna seokaniko man·na nanga aro ain gita ja·ku de·aniko dakna bil donga. North Garo Hills a·jaon kamna ra·aniko a·bachengatgipa ong·ahaoba, maini gimin gipin a·jarang result-rangko parakatpilahaoba da·onan North Garo Hills a·jaode result-rangko parakskakujaenga ine Rongrong-ni MDC sing·doataha.