Resubelpara, May 23, 2025: Kharkutta-ni MDC Cherak W.Momin, Bristibar salo, Adokgre jolni bang·a chatro chatrirangan Adokgre, RMSA Higher Secondary Skulo class 10+2-ni admission-rangko ra·na seat-rang chu·ongjani a·selo neng·nikaniko man·tokengani gimin, Adokgre, RMSA Higher Secondary Skulo class 10+2-na room-rangko baridapatchina mol·mole, a·dokni Skotong Minister Conrad K.Sangma-na North Garo Hills, a·jani Deputy Commissioner-ni jak gita lekka sedoataha.

Adokgre jolo poraienggipa chatro chatrirang mikkangchi maikai Higher Secondary gadango poraipana cholko man·gen, uni gimin Adokgre, RMSA Higher Secondary Skulo class room-rangko baridapatchina Skotong Minister-ko didiataha.

Adokgre, RMSA Higher Secondary Skulo admission ra·na man·gijagipa chatro chatrirangni bidingo Momin, Bristibar salo RMSA Higher Secondary Skulni Principal aro gipin skigiparangko gronge, agan golpogrikangaha.

Adokgre jolo RMSA Higher Secondary Skul ge·sasan dongaia aro ia skulon 10+2-ni chatro chatrirangna poraianiko skie on·enga aro 10+2 class-o poraitokenga. Indiba rasong gribee, ia skulo chu·onga gita seat-rang dongjani a·sel, neng·nikaniko man·tokenga, maina class 10 pass ka·gipa chatro chatrirang bang·ani a·sel seat-rang tiktaksan dongaia. Uni a·sel bang·a chatro chatrirangan admission ra·na man·tokjaenga ine Momin parakataha.

Bang·bata chatro chatrirangni ma·a paarangan tangka paisarang chu·onga gita dongpajani a·sel, chel·a biaprangchi dedrangko poraiatna chol man·tokja. Uni a·sel chadamberangni poraianio namen risk ong·enga aro tang·dodapna man·jaenga ine Kharkutta-ni MDC parakataha.

“Uni gimin, senggnang ia obostako ta·rakale nangni bil ama gita nirokatpachina aro chatro chatrirangni namgnina Adokgre, RMSA Skulo Morning Shift-ko kulie on·pachina, duko ga·akenggipa chatro chatrirangko higher secondary gadango poraina cholko on·pachina, anga mol·molpaenga” ine Momin-ni seatgipa chittio janapataha.

“Anga ka·donga aro bebe ra·a, na·a saksa bil gnanggipa dilgipa ong·e, ia kamko ta·raken nirokatgen” ine Momin ka·donganiko parakataha.