Shillong, Dec 18, 2024: Re·baenggipa 2025 bilsini February 21 tariko Khasi Hills Autonomous District Council (KHADC) aro Jaintia Hills Autonomous District Council (JHADC)-ni election-ko ong·atgen ine a·dok sorkari Monggolbar salo parakataha.

A·dokni Deputy Chief Minister aro District Council Affairs (DCA) Minister Prestone Tynsong-ni kobor ra·timgiparangna parakatani gitade, KHADC aro JHADC election-ko ong·atna DCA department-ni proposal-o pangchake, Cabinet-ni ku·pattianiko a·dokni Governor ra·chakaha.

KHADC aro JHADC election-na gazetted notification-ko January 27 tariko on·gen, nomination file ka·ani bon·kamgipa tarikara February 3 tarik ong·gen aro apsan salon nomination lekkarangko scrutiny ka·enba, nomination lekkarangko ra·pilani bon·kamgipa tarikara February 4 tarik ong·skagen ine DCA Minister parakataha.

“KHADC aro JHADC election-na lekka sikdepaniko February 21 tariko ong·ate, result-rangko February 24 tariko parakgen,” ine Tynsong u·iataha.

Model code of conduct (MCC)-ko ra·gatani bidingo sing·anina aganchakengon, January 27 tariko u·iatahani gimin ia apsan salon MCC-koba ra·gatgen ine Tynsong parakataha.