@ghdnews.in@

Tura, Dec 9, 2025:West Garo Hills a·jani Dalu C&RD Block-ni ning·o donggipa Kerapara-oni Rimrangpara gita napake Mibonpara songona re·gipa PMGSY ramako salanti walni somoio Dumper garirang ro·ong gatprete (overloaded) salruraani a·sel gital tarigipa PMGSY rama nosto ong·aha ine Sairill Marak u·iataha.

Iandake songni development-ko nosto ka·na nangja aro jolo songdonggipa manderangna neng·nikaniko ra·bana nangja ine parakatenba, Sairill D Marak re·anggipa November 21 tarikon Kerapara Pulis Outpost-ni In-charge-na badi ka·doangahachim.

Indiba da·alona kingkingan, iana maming ja·ku de·aniko dakkujaengani gimin, December 9 tariko West Garo Hills a·jani Deputy Commissioner aro SP-na badi ka·doangenba, iani bidingo ta·rake ja·ku de·china Marak didiataha.

Sairill Marak-ni parakatani gitade, Kerapara-oni Rimrangpara gita Mibonpara songona re·gipa ramako ia bilsiosa taria matchotachim, indiba ia ramako dal·dalgipa dumper garirang nangana batpile ro·ongrangko gatprete salani a·sel ta·raken nosto ong·aha.

Ia ramako a·dok aro ma·mong sorkari jolo songdongenggipa manderangni namgnina tarie on·aha. Indiba ia ramako saniba man·gnina rike ro·ongrangko nangana bate gatprete salani gimin jolni manderangna neng·nikaniko ra·baha.
.
“Mikkangchi ia ramako nangana bate ro·ongrangko gatprete salna man·jawa aro anga iako nie dongjawa” ine Marak mikkrakataniko on·ataha.