Shillong, June 27, 2025: Indore songjinmani Raja Raghuvanshi-ko Sohra jolo so·otani mamlao rim·ako man·gipa sakgittam manderang chong·motan Shilom James, Balbir Ahirbar aro Lokendra Singh Tomar-ko Bristibar salo, Meghalaya Pulisni Special Investigation Team (SIT), Shillong-ona rimbaaha aro ua sakgittam manderangko Chief Judicial Magistrate-ni katchario mikkangpaatani ja·man saldokna pulisrangni ning·o donchina katchari raiko on·aha.

Rim·a man·gipa sakgittam manderangoni Shilom James-ko pulisrang, Sonam Raghuvanshi-ni bag-oniko pistol, guli aro tangkarang baksa adita sakkirangko so·e galani gimin rim·aha.

Balbir Ahirbar, jekon ‘Ballu’ ineba mingklakachim, uan Sonam Raghuvanshi-ni donge chakgipa nokni security guard ong·achim aro ua mande, Sonam-ni re·ruraanirangko name ma·sina nanga ine pulisrang, sing·sandina rim·skaha.

Pulisrangni rim·gipa gittamgipa mandeara Indore songjinmao Sonam-ni dongchakgipa nokni nokgipa Lokendra Singh Tomar ong·achim aro uko Meghalaya Pulis-ni SIT, Gwalior-oniko rim·ani ja·man Shillong-ona rimbaaha.

Shilom James-ko rim·ani ja·man, pulisrang Butbar salo, Indore songjinmao donggipa chiring dilsaoniko pistol pongsa, magazine ge·gni aro .32 guli ronggniko baksana gong 50,000 tangkarangko man·aha.

Indore songjinmao rim·ako man·gipa Shilom James, Butbar salo pulisrangko chiring dilsaona rimangenba, ua biaponiko pistol aro gulirangko mesokaha. Ua mandeko sing·sandion, ja·mano an·tangni i10 garioniko gong 50,000 tangkarangko man·aha.

Ua tangkarangko, Sonam-ni mikchagipa Raj Kushwaha-ni laptop bag-oniko ra·aha ine James ku·rachakaha.

Iani bidingo talataniko on·engon, laptop bag-kode so·e galaha, indiba laptop-kode man·kujaenga ine East Khasi Hills a·jani SP Vivek Syiem parakataha.

Syiem-ni aganani gitade, ia laptop-ko Shilom
James an·tangan ramasamchi galataha ine ku·rachakaha, indiba da·o dipet ua laptop-ko man·pilkujaenga.

Adita salrangna skang Meghalaya Pulisrang Indore songjinmani MR3 Hare Krishna Vihar minggipa biapo wa·al so·gimin bag ge·sako man·aha aro ua bag-o gong lak 5 tangkarang, pistol, Sonam-ni phone aro Raja-ni ma·manti gam-jinrang dongna nanga ine pulisrang chanchichipa.

Batanggimin salrangonin Meghalaya Pulisrang tangka paisa aro ma·manti bosturang donggipa bag baksa Sonam-ni mobile phone aro pistol-koba sandiengachim.

Sohra-o Raja-ko so·otani ja·man Sonam, Madhya Pradesh a·dokona re·angpile Indore songjinmani nok te·sao donge chakaha aro ua nokon an·tangni bag-koba donangahachim.

Raja-ko so·otanio jak donggipa Raj Kushwaha aro gipin manderangko pulisrang rim·aha ine ma·siani ja·man Sonam, June-ni 8 tariko, an·tangni dongnuchakenggipa nokoni ong·kate, June-ni 9 tariko, Uttar Pradesh a·dokni Ghazipur-o an·tangko bame on·eaha.