Shillong, Oct 23,2024: Re·baenggipa November 13 tariko ong·atenggipa Gambegre by-election-o susana gita Tura-ni BJP MDC aro BJP-ni State Vice President Bernard N Marak-ko BJP-ni candidate-na seokaha.
Gambegre by-election-na candidate-ko parakatahani gimin a·dokni BJP kamrangko ka·na gita Budbar salo, BJP-ni National Secretary, National Spokesperson aro Meghalaya-ni In-Charge AK Antony baksa tom·e chanchirimgen.
Iani bidingo kobor ra·timgiparangna aganengon, BJP tikitna sakgittam dilgiparang dorgasto on·giparangoniko baseenba, Tura-ni MDC aro BJP State Vice President Bernard N Marak-ko seokaha ine BJP-ni State Spokesperson Mariahom Kharkrang parakataha.
Gambegre by-election-na da·o candidate-ko parakatahani gimin campaign ka·anirangko a·bachengatgnok ineba Kharkrang aganaha.
Kharkrang-ni aganani gitade, campaign-rangko a·bachengatna gita dingtang dingtang gadangrango kam ka·enggipa BJP-ni pilak bipekrangnan u·iatmanaha.
Gambegre by-election-o Skotong Minister Conrad K Sangma-ni jikgipa Mehtab Chandee A Sangma, GHADC-ni MDC Sadhiarani Sangma aro gipinrang susaengani gimin, namen bilakbee susagrikna sienggipa election ong·enga. BJP candidate Bernard Marak-ba saksa MDC ong·engani gimin batanggipa bilsirango BJP-ni dingtang dingtang gadangrango kam ka·e manderangni chakpaaniko man·gipa ong·achim aro gipinrangna bate komigipade ong·jaenga ine BJP-ni State Spokesperson parakataha.
Indake ong·engon, a·dok sorkari bang·en tangka paisarangko jakkalsretahani a·sel manderangni janggi tanganio neng·nikanirangko man·tokengani gimin namgipa sorkariko rikna, songo noko manderangni janggi tanganirangko namdapatna aro tangka paisa jakkalsretaniko bon·atna gitasa Gambegre by-election-o susaenga ine BJP-ni candidate aro State Vice President Bernard N Marak parakataha.
“Gambegre-ni manderang, tangka paisa jakkalsretaniko seokgenma, ma namgipa sorkariko rikna seokgen, manderangni jakosa pangchakaignok. Tangka paisa cha·gipa sorkarini a·selan Gambegre constituency-ni kangal cholgri aro kakket ong·gipa manderang neng·nikanirangko chagrongna nangenga. Ia by-election namen dingtangmancha gamchatgipa election ong·na sienga. Maina ia by-election-o sorkarini dakchakanirangko man·jaengani gimin manderang BJP-nan pu·ontelgen”ine Marak parakataha.
Gambegre-ni MLA Saleng A.Sangma Tura-ni MP seokako man·e, MLA-ko watangani ja·man, Gambegre constituency-ni seat bangbang ong·aha aro uni a·sel da·o by-election-ko ong·attaina nangenga.
Indake Gambegre by-election-o susaenggipa TMC-ni candidate aro GHADC-ni MDC Sadhiarani M Sangma, October-ni 23 tariko, Skotong Minister Conrad K Sangma-ni jikgipa aro NPP-ni candidate Mehtab Chandee A Sangma, October 24 tariko aro Congress candidate Jingjang M Marak-ba October 24 tariko nomination file ka·anggen. Uandake, nomination file ka·ani bon·kamgipa sal October 25 tariko ong·enga.
