Resubelpara, April 12, 2026: A·doko Niamgri koela bikotaniko am·sandina songako man·gipa, High Court-ni gitcham Justice BP Katakey, Budbar salo, Garo Hills-ona re·bae, niamgri koela bikotaniko champengatani bidingo chanchirimna, North Garo Hills, East Garo Hills aro South Garo Hills a·jani District Administration-rang baksa Resubelpara-o tom·aniko ong·atangaha.

Ia tom·anio, a·ja damgittamni Deputy Commissioner (DC)-rang aro Superintendent of Pulis (SP)-rang, a·dok sorkarini Technical Advisor Naba Bhattacharjee aro Mining Department-ni Director MB Tomper-mang dongpae bak ra·angaha.

Tom·a matchotani ja·mano kobor ra·timgiparangna aganengon, Meghalaya a·doko, mongsongbate Garo Hills-o niamgri koela bikotaniko champengna gita Action Plan-ko tarina Garo Hills-ni official-rang baksa tom·aniko ong·ataha ine Katakey aganaha.

“Meghalaya a·doko da·onaba niamgri koelarangko bikotengkua aro iako darangba jegalna man·jawa. Iani a·selan adita salrangna skang, sak 18 manderang janggirangko gimaatna nangaha,” ine ua aganaha.

Koelarangko salruraengani bidingo janapangengon, ia sal somoirango, niamgri koela bikotgiparangko, sandie man·gipa, niam gita bikotgipa aro sorkarini rim·gimin koelarangko salenga ine Katakey aganaha.

“East Jaintia Hills a·jani koela a·damo gopretani ja·man, Mining & Geology Department-ni ge·etanio pangchake, District Administration-rang, Action Plan-rangko tariaha aro ia gital Action Plan-ko ra·gatani ja·man, niamgri koela bikotanirangko adita komiatna man·aha, indiba am·sandie man·giparangoni aditako nambate nipiltaina aro namatna nangkuenga,” ine ua aganaha.

Niamgri koela bikotani gimin, dingtang dingtang pulis station-rango badi ka·ani gimin janapangengon, “A·a nokgiparangni ia kamo jak donganikode sandiroka dongkujaenga, a·a nokgiparangni kamrangkoba sandirokna nanga, maina a·a nokgiparangni ra·chakani gride, walsano ua biaponiko koela bikote salna man·jawachim. Uamangni a·arango mai ong·enga uko uamang ma·sija ine uamang aganna man·jawa,” ineba Katakey aganaha.

South Garo Hills a·jana agrede, North aro East Garo Hills a·jaode niamgri koela bikotenggipa a·damrang dongjaha.
North Garo Hills a·jaona re·bana, Assam-ni Athiabari sambao donggipa Hahim songona re·ange, niamgri donenggipa koela a·damrangko nieaha. Athiabari sambao Smart Gate, Dainadubi transport gate-oni metre 100-ni ning·o pulis picket aro Mendipathar Railway Station-o temporary check gate-ko kulina, bakan Meghalaya High Court-na sedoatgen ine Katakey parakangaha.