@ghdnews.in@

Shillong, Feb 18, 2026:: A·dokni Job Reservation Policy (JRP), 1972-ko taridapna dabijachina a·dokni dingtang dingtang NGO dolrangko, Reservation Policy-ko nipilna sorkarini songe on·gipa, Expert Committee ku·pattiataha.

Reservation Policy-o dingtangatanirang donggenchimode, ian gipin dolrangni bilrango ba man·gnirango nangchakeaniko ra·bagen aro Meghalaya a·dokni Job Reservation Policy 1972-ara, Indra Sawhney-ni case-o Supreme Court-ni rai on·na skangan ong·ani gimin Judicial Scrutiny-ko dakanio chena man·janaba gnang ine Expert Committee parakaha.

Job Reservation-o 50% percent-na batjachina dongimin niamko pe·ani bidingo, maikai Mr Balaji vs State of Mysore aro Indra Sawhney vs Union of India-ni rai on·anio, Reservation Policy-rangko den·galpilahachim, iarangni gimin, Expert Committee janapataha.

Batanggipa 2014 bilsio Maharashtra sorkari, Schedule Castes (SC), Schedule Tribes (ST) aro Other Backward Classes (OBC)-rangna dongsogimin reservation-rang baksana Maratha jatna 16%-ko on·dape ge·etaniko on·ahachim, indiba dongimin, 50% percent-na batahani gimin 2021 bilsini May 5 tariko, Supreme Court-ni rai on·anio ua Reservation-ko den·galpilaha.

Andhra Pradesh a·dokoba, Scheduled Tribe (ST)-rangna Scheduled Area-rango skigipani kamko 100% percent Reservation on·na gita, Governor u·iatahachim, indiba Supreme Court-o badi ka·doangani ja·man, Indra Sawhney-ni dongimin 50%-na bataha ine nike, Andhra Pradesh sorkarini on·gimin, ge·etaniko Supreme Court den·galpilaha.

Bihar a·dokoba, dongimin 50% percent-na bate, 65% percent-ona Bihar sorkarini ra·doataniko, Patna High Court-o badi ka·ani ja·man, Bihar Reservation (Amendment) Act, 2023 aro Bihar Reservation of Vacancies in Posts and Services (For Scheduled Castes/ Scheduled Tribes, and Other Backward Classes) (Amendment) Act, 2023 minggnikon, High Court den·galataha. Ia case-ko da·o Supreme Court, jako ra·skaenga.

Apsan daken, Tamil Nadu a·dokoba Backward Class-rangna Tamil Nadu sorkari, dongimin 50% percent-na bate 69 percent-ona ra·doatani ja·man, niamko ja·rikchina Tamil Nadu High Court, Tamil Nadu sorkarina ge·etaniko on·aha. Ia case-ko ja·mano, Supreme Court jako ra·on, Tamil Nadu sorkari, dongimin 50% percent-kon ja·rikna nanga, ine Supreme Court raiko on·aha.

Kosako janapgimin case-rango pangchake, Job Reservation Policy (JRP)-kode, mande jelbra jelsuanio pangchake tarina man·ja, Indra Sawhney-ni raio dongimin 50% percent-na batna man·ja, badiaba jat ba biapna 50%-na bate on·na man·ja, ine Expert Committee-ni report-o parakaha.

Meghalaya a·dokoba, badiaba jat ba biapna Reservation-ko dongimin 50% percent-na bate on·genchimode, Meghalaya a·dokni Backward Class-rangna on·gimin, cholrangko ra·sekani ong•gen, ineba Expert Committee talatangaha.