Shillong, Feb 25,2025: Re·anggipa February 21 tariko ong·atanggipa Khasi Hills Autonomous District Council (KHADC) election-ni result-ko Sombar salo parakatanio Voice of the People’s Party (VPP), KHADC-ni chu·gimik dam 29 seat-rangoni dam 17 seat-rangko cheahani gimin, KHADC-o gital Executive Committee (EC)-ko VPP rikangskagnok.

Ua kobor ra·timgiparang baksa agangrikengon, “Election-o chinga dingtang dingtang ra·biani aro neng·nikanirangko chagrongna nangahaoba, KHADC election-o chena man·ahani gimin, anga bilongen kusi ong·a. Ia election-o chingko Rangbah Shnong-rangni aro media-rangni kosako ong·gija daka ine matnangtokahaoba, chinga tangka paisani bilrangko warachakna nangahaoba, manderang ching baksa ong·ahani gimin chinga manderangko mittelpilna sika. Chinga maming dakeba Rangbah Shnong ba media-rangni kosako chakatgipa ong·ja, indiba name chalaigipa sorkarikosa nangnikaia. Ia election-o chu·sokgipa ong·na man·ahani gimin chinga Nokgipa Isolko aro chingna pu·ongipa pilak manderangkon mittelpilna sika. Ian a·bachenganisan ong·kuenga,” ine VPP-ni President Ardent Miller Basaiawmoit aganaha.

Ia chango KHADC-ni gital EC-ko VPP, gipin dolrang baksa bakrimna nanggijan doltangari chalaigen, ineba Basaiawmoit aganaha.
“Chinga chu·onga gitan seat-rangko cheahani gimin doltangari kamko ka·aigen. Gipinrang EC-na chakpaaniko on·na sikgenchimode, chakpaaniko on·na man·aigen indiba election-ni ja·man chinga darang party baksaba bakrimani dongjawa” ine VPP-ni President aganaha.

Jaintia Hills Autonomous District Council (JHADC) election-o VPP, dam 8 seat-rangkosan chena gita man·aiaha. Iani bidingo janapatengon, somoi ong·ahaon uamang nangani kri ja·kuko de·angaigen ine Basaiawmoit parakataha.

“JHADC-oba chinga gipin party-rang baksa bakrimna nangnikjaenga. Chinga party-ni dilgiparang apsan chanchienba nangani kri ja·kuko de·angaigen” ine ua aganaha.

Jaintia Hills-o agrepile bil jakrangko jakkale susaahani a·sel, VPP-na nangchakeaniko ra·baaha, ine Basaiawmoit gipin dolrangko matnangataha.

“Jaintia Hills-ni bang·a songrangon bil jak aro tangka paisarangko jakkalani a·sel manderang, jakgitele dilgiparangko seokna man·jaha aro iani a·selsa JHADC-o chinga chu·sokna man·jaha. KHADC-o gita jakgitele aro nama bewalo election-ko ong·atna man·ode, JHADC-oba chingan chegopaigenchim” ine Basaiawmoit aganaha.