Tura, Sept 7, 2024: Garo Hills Autonomous District Council [GHADC]-o kam ka·enggipa, Non Gazetted Employees Association (NGEA) an·tangtangni man·na nangenggipa ja 35-ni dormaharangko fifth pay commission-o on·china dabie, re·anggipa August 19 tarikoni September 6 tarikona asonge jingjengata sal 14 gapaha. Indiba GHADC-ni EC-rang maming ka·dongataniko aganchakkuja ine aganaha.
NGEA-ni President Brithen M.Sangma-ni aganani gitade, GHADC-ni dilgiparang skanggipao jasani dormahako gitcham fixed pay scale, fourth pay-ko on·e, jingjengataniko dontongchina aganaha, indake gnigipa aro gittamgipaoba, apsan jagittamni dormahako gitcham, fourth pay scale-o on·na order-ko on·taie, jingjengataniko dontongchina changni chang mol·molaha.
Indiba, “Chinga jeko target done, a·bachengonin fifth pay-ko on·china dabiengachim, ia miksonganiko chu·sokatja dipet chinga jingjengataniko dontongjawa. GHADC-ni dilgiparang jegitaba rake dal·eba aganbo, chingaba chingni dabianiko rakbate aro kimkim ong·bate dabiangskagen. Jeko chinga jinma jak songe ra·chakahachim, uko maming dakeba dontongjawa aro an·piljawa” ine NGEA-ni dilgipa aganaha.
Da·o chingna jagittamni dormahako on·na order on·gipaoniko, “Chingna jasa mangmangniko fifth pay-o on·skabo, ineba chinga bi·aha, indiba maini gimin chingna jasa mangmangni dormahako fifth pay-o on·na neng·nikskaenga ukon chinga ma·sina man·pilja. Bisong jegita ka·tong raka, chingaba chingni miksongako rim·kepe dongskagen” ineba Brithen Sangma aganaha.
Batanggipa sal somoirango GHADC-ni CEM-ko gronge, chingni dormaharangko on·pachina mol·molaha. Unon, CEM indake aganaha, “Na·simang tangka paisani bidingo angko pressure ka·nabejok, da·ode, anga Finance-ni Incharge ba Finance-ni Power-ko jako ra·jajok. Finance-ni EM Incharge-ko dingtang seokaha, uko gronge pressure ka·skabo, angade tangka paisani gimin mamingkoba dakna bil man·jajok”.
GHADC-ni CEM ong·ahaon, pangnan CEM-sa finance-ni incharge ba tangka paisani bidingo jako ra·e kamko ka·achim, indiba ia changode namen singtangskajok, maidakgipa system-o GHADC-ko chalaina miksonge, tangka paisani bilko gipin EM-na on·skaaha ma·sina man·piljajok. Uni gimin, “Chinga tangka paisani EM incharge, Lenikar K.Sangma-ko gronge, chingni man·gni dormaharangko on·pachina aganahachim, indiba ua chingna maming ku·sakoba aganchakjaha” ine Brithen Sangma aganaha.
“Chinga da·alo ia Tura Govt.Field-o asonge jingjengata sal 14 gapaha, uni gisepon chingna maming ka·dongataniko on·kujaenga, Chingni duk chakaniko ma·sichake, Finance Incharge-ni EM, chingna ku·rang on·na nangchongmota, maini gimin, indita salna jingjengataniko dakengoba ku·rang ku·saba on·gija dongenga, chingna maiba ka·dongatani ku·rangko on·genchimode, chinga jingjengataniko dontonge, kamtangko ka·pilgenchim” ine NGEA-ni dilgipa suk ong·gijaniko parakataha.
