Dadenggre, June 6,2025: West Garo Hills a·jani Dadenggre Civil Sub-Division ning·o ga·akgipa Jangrapara-oni Rondupara songona re·gipa PWD rama namsrangjahani gimin, ta·raken taripile on·china A·chik Consious Holistically Integreded Krima (ACHIK) Rondupara Sub Unit-ni dilgiparang West Garo Hills-ni Deputy Commissioner (DC)-ni jak gita a·dokni Skotong Minister Conrad K Sangma-na chitti sedoataha.
ACHIK Rondupara Sub Unit-ni Skotong Minister-na seatgipa chittio parakatani gitade, ia PWD ramara jolo songdongenggipa manderangna namen nangchongmotgipa ong·a, jedake poraienggipa chatro chatrirang salanti ia ramako re·ruraenga, bading chiwalgiparang jakkalenga aro salantio dingtang dingtang nanga kamrangna re·a doanio nangchongmotgipa rama ong·achim.
Indiba ia ramako maming taridapile on·a dongjani a·sel, da·alo ia ramani obostarang namsrangjaha aro a·klokrara dake rimilaniko nikna man·aha ine ACHIK Rondupara Sub Unit-ni President Mangrakwell M Marak parakataha.
Indake salantio re·rurana jakkalenggipa ramani obostarang namgijae, garirangko salanio bang·en, a·sel ong·na kenchakani ong·enga.
Ia rama nosto ong·ani a·sel skulo poraienggipa chatro chatrirang somoi gita sokna man·jae neng·nikani ong·enga. Sagiparangko sanna bananioba, namen neng·nikenga aro game ge·e cha·giparangni man·gipa bolam bolterangko antio palna ra·angoba namen neng·nikaniko man·tokenga ine ACHIK Rondupara Sub Unit-ni General Secretary Danseng M Marak parakataha.
Uni gimin, ia jolo songdongenggipa manderangni namgnina chanchie aro namroro silroroatani bak gita Jangrapara-oni Rondupara-ona re·gipa PWD ramako ta·rake taripilchina, ACHIK Rondupara Sub Unit-ni dilgiparang a·dokni Skotong Minister Conrad K Sangma-ko mol·molataha.
