New Delhi, May 14,2025: India a·songni salgipeng Kashmir-o donggipa Shopian a·jani Shukroo jolo, Indiani sipairang Monggolbar salo, Lashkar-e-Taiba (LeT) bobil dolrang baksa gogrikanio sakgittam bobil dolni manderang so·otako man·aha.

Pulis officer saksani u·iatani gitade, Keller buringo bobil dolrang ma·chakenga ine koborko man·ani ja·man, ua joloniko Indiani sipairang bilake am·sandianirangko dakna a·bachengataha aro sipai dolrangko niksoon, bobil dolrang an·tangtangni ra·bitenghipa silchidarerangchi gona a·bachengaha.

Bobil dake chakatgipa manderang sipairangko gona a·bachengani gimin sipairangba gochakskaaha aro uandaken dolgnini gisepo bilakbee gogrikani ja·mano, LeT bobil dolni sakgittam manderang so·otako man·aha.

So·otako man·gipa sakgittamoni sakgnide, Shopian a·jao donggipa Chotipora Heerpora-oni Shahid Kuttay aro Wanduna Melhora-oni Adnan Shafi Dar ong·achim. Gittamgipa mandekode da·o dipet official-rang ma·sina man·kujaenga.