Shillong, Feb 19, 2026: Meghalaya a·dokni Skotong Minister Conrad K Sangma, a·dokko chel·chake rakkina man·na gita gipin biaprangoni Meghalaya a·dokona napbaenggipa manderangna, Immigration and Foreigners Act, 2025-o pangchake permit-ko on·china proposal-ko on·aha ine Assembly budget session-ni gittamgipa salo parakataha.

Skotong Minister-ni aganani gitade, gipin biaponi Meghalaya a·dokona re·baenggipa manderang, permit gnangsa a·doko napna man·na miksonganio on·enggipa proposal ong·a.

Ia ILP-ko ra·gatani bidingo Leader of Opposition Dr Mukul Sangma-ni sing·anina Skotong Minister aganchakengon, iani bidingo uamang kam ka·engkua ine aganchakaha.

Iani bidingo Ministry of Home Affairs baksa chanchirime technology-ko tarisamsoani ja·manosa songsalo dilgiparang, tour operator aro political party-rang baksa agangrikna nanggen ineba ua janapataha.

Iako ra·gatna miksonganiara, a·dokona napani aro ong·katani cholgugarango check point-rangko songani ong·a ine Skotong Minister aganaha.

Sixth Schedule-ni bidingo janapatengon, Sixth Schedule-ni ning·o ga·akgipanade maming nangchakeani dongjawa, indiba niamgri gipin biaponi napsrukbagipa manderangko sandisoaniko dakna miksonganio iako chu·sokatnade, Immigration and Foreigners Act, 2025-o pangchake ILP(Inner Line Permit)-ko ra·gatachi man·gen ine ua aganaha.