@ghdnews.in@

Shillong, Feb 19, 2026 Meghalaya a·doko Inner Line Permit (ILP)-ko ra·gatna gita ma·mong sorkarini ra·chakaniko man·kujaengani gimin Immigration & Foreigners Act 2025-ni ning·o a·dok sorkari, a·dokko chel·chakna miksongengani bidingo ruling aro opposition MLA-rangni gisepo jera ra·grike ding·chaogrikani ja·man, Budbar salo, Assembly Session-ko Speaker Thomas A Sangma, minute 10-na dontongataha.

ILP-ni bidingo jera ra·grike ruling aro opposition MLA-rang ding·chaogrikna a·bachengani gimin, Assembly-ni Speaker MLA-rangko asongchina aganahachim, indiba uamang asongjahani gimin, Assembly Session-ko minute 10-na Speaker dontongataha.

ILP-na dabidilanio a·dok sorkariko kakket ong·jaenga ine Voice of the People’s Party (VPP)-ni MLA Ardent M Basaiawmoit matnangahani gimin ruling aro opposition MLA-rangni gisepo ding·chaogrike jera ra·grikna a·bachengaha.

Basaiawmoit-ni matnanganiko jegalatengon, ua changni chang a·songni Prime Minister aro Union Home Minister-na ILP-ni bidingo sedoataha ine a·dokni Skotong Minister Conrad K Sangma aganchakenba, badita chang Prime Minister aro Union Home Minister-na ILP-ni bidingo sedoatskaaha ine VPP MLA-ko sing·doangskaaha. Basaiawmoit an·tangde ILP-ni bidingo Union Home Minister-ko grongean dongkuja ine Sangma aganaha.

Skotong Minister-ni aganchakani ja·man, Deputy Chief Minister Prestone Tynsong-ba VPP MLA Ardent M Basaiawmoit-ko ILP-na gisik nangchongmota ong·ode, an·tangan Delhi-ona re·ange dabidilna nanga, manderangni mikkango ‘dakmesoke’ rona nangja ine aganskaaha.

Dolgnini gisepo ding·chaogrikahani gimin Assembly Session-ko minute 10-na dontongatani ja·man, Assembly-o nama bewalo chanchirimchina aro Assembly-ko mande ra·china MLA-rangko Speaker mol·molaha.

ILP-ni bidingo aganchakaniko on·angengon, sorkari ILP-ko man·e on·na gita ma·mong sorkari baksa agangrikenga aro iako galchipaha ong·ja ine Skotong Minister talatangaha.

ILP-ko ra·gatani bidingo ma·mong sorkari da·o dipet aganchakaniko on·kujaengani gimin, a·dok sorkari, Immigration & Foreigners Act 2025-ni ning·o a·dokko naljoke rakkina dingtang cholrangko niskaenga ineba Sangma aganaha.

VPP MLA-ni matnanganina aganchakengon, ILP-ni bidingo uamang changni chang India sorkariko gronge agangrikaha ine Skotong Minister aganaha.

ILP-ko namen nangchongmotenga ong·ode, Basaiawmoit an·tangba uamang baksa Delhi-ona re·ange, ILP-ni bidingo ma·mong sorkari baksa agangrikna nanga ineba Sangma aganaha.

NGO-rang aro dingtang dingtang dolrang ILP-ni bidingo ma·mong sorkarina sedoataha, indiba VPP MLA an·tangde changsaba seata dongkuja ine Skotong Minister aganaha.