Guwahati, May 8, 2025: May 7 tarik Butbar pringo Guwahati Pulis gong kror 5-ni pekatgipa ringani samko Guwahati Railway Station-o ra·sekaha.
Iani bidingo ning·joljol koborko man·soe, Panbazar Pulis Station-ni pulisrang Butbar pringo Guwahati Railway Station-o donggipa Coimbatore Express-oniko me·chikma saksako rim·aha.
Pulisrangni sandimiting somoio, komibeoba gong kror 5-ni hajal 20,000 Yaba tablet-rangko me·chikma saksaoniko man·aha. Unbaksana, mobile ge·sa aro tangka gong 1000-ko pulisrang man·aha.
Ia mamlao pangchake, bilsi 31 ong·gipa me·chikma Parvina Khatun Bibi-ko Pulis rim·aha ine pulis officer parakataha.
