@ghdnews.in@

Mangsang, Dec 13, 2025: Garo Students’ Union (GSU) Mangsang Regional Unit-ni dilgiparang, re·anggipa December 11 tariko a·dokni Skotong Minister Pa Conrad K.Sangma-ko Shillong-o donggipa uni office main Secretariat-o gronge memorandum-ko on·baaha.

GSU Mangsang Regional Unit, East Garo Hills a·jao donggipa Mangsang-oni West Khasi Hills a·jani Riangdoh-ona najokegipa ramako dal·batate aro nambate tarichina dabie, Skotong Minister-na memorandum-ko on·baaha.

GSU Mangsang Regional Unit-ni President Barnawel R.Sangma-ni u·iatani gitade, Mangsang-oni Riangdoh-ona re·gipa rama namen sepangbatgipa ong·a aro Rongjeng-oni Shallang-Riangdoh ramana bate, Mangsang gita re·gipa ramaan bakkandikbatgipa aro seng·sotbatgipa rama ong·a. Uni gimin ia ramako ta·rake tarie on·pachina Skotong Minister-ko mol·molbaaha.

GSU Mangsang Regional Unit-ni Skotong Minister-na dabie seatgipa chittio janapatani gitade, Mangsang-o gital C&RD Block-ko songe on·china aro Mangsang PHC-ko CHC-ona ra·doate on·china gitaba dabiangjolaha. Una agreba, Rongjeng aro Mangsang gita A·dokgre-ona re·gipa ramako ta·rake tarie on·pachina GSU Mangsang Regional Unit, a·dokni Skotong Minister-ko mol·molbaaha.