Baghmara, Sept 17,2024: A·chikrangna dingtang a·dokko ba Garoland State-na dabianiko bilakbatatna, GSMC Siju Regional Unit-ko songe on·angaha.
A·chik a·songni jakgitelna krenge, A·chik a·song gimikni manderang, songni nokni pilak Nokmarang, Sordar-rang ku·cholsan ong·e bakrimaniko nangenga. Uni gimin, ia September-ni 20 tariko GSMC dal·begipa tom·bimonganiko Baghmara-o ong·atenga, uanona sakantian re·bae bakko ra·epachina GSMC mol·molataha.
Uandake, A·chik a·song gimiko apsan ku·monge Garoland-na dabianio ku·rang on·grimna, gita GSMC Siju Regional Unit gitalko songe dilgiparangko seokangaha.
Seoka man·gipa GSMC Siju Regional Unit-ni dilgiparangara Lejubirth N.Marak Chairman, Kasim A.Sangma Co-Chairman, Amsan R.Marak General Secretary, Nabath D.Sangma Assistant General Secretary, Nikrangra A.Sangma Organising Secretary, Babostin R.Marak Publicity Secretary, Funny D.Shira Accountant, Tatsing D.Shira Finance Secretary, Jackiman G.Marak Information & Public Relations Secretary, Bryanzil D.Shira Environmental Secretary, Tangseng N.Marak aro Salsarang R.Sangma Assistant Organising Secretary-rang, Dihing R.Sangma Games & Sports Secretary, Aning M.Sangma Arts & Cultural Secretary, Binjang R.Sangma Adviser aro gipin sak 23 Executive Member-rang, A·chik a·songni kona noksikrango donggipa GSMC-ni dilgiparang baksa apsan ku·monge Garoland State-na dabianio bakko ra·anggen, ine GSMC Southern Zone, Baghmara-ni General Secretary Donchang M.Sangma parakataha.
“Garoland State-na chengonin Sonaram R.Sangma an·chi pari nika gri 1895 bilsio dakgrikdilangaha. Uandake, 1946 bilsio Mody K.Marak aro Emonsing M.Sangma British dilgiparangna A·chikrangko dingtangatjachina sedoataha. Uamangni ja·mano Clifford R.Marak, Purno K.Sangma, Dilash Marak, Champion R.Sangma bilake Garoland-ko man·na dabidilangaha” ine GSMC HQ-ni Acting Chairman Balkarin Ch. Marak tom·anio dongpae aganangaha.
“An·ching A·chik sakantian Garoland State-ko man·na an·tangtangko on·kangna nangenga. An·ching gipin jatrangni sasono donggija, jattangchi sason ka·aniko nangenga. Uni gimin, an·ching bilake Garoland-ko man·na ku·mongani sal ong·engaha” GSMC Southern Zone-ni General Secretary Donchang Sangma tom·anio talatangaha.
